Rokstu sagataveja: portals lakuga.lv

Piecsvātku nedeļai rakstureiga lāna doramūs dorbu atsuokšona i atsagrīzšona pīrostajā ritmā, deļtam ituos nedelis īsacejumus, kas saistuos ar mīreigu Kruoslovys piļs apskati, zeimeigi, ka itūgod Kruoslovys piļs svietej 230 godu jubileju, dobys izbaudeišonu Odumovys dobys stygā i laimis sajiutys giušonu Laimis muzejā Indrā, ir saryupiejuse Kruoslovys nūvoda Turisma informacejis centra puorstuove Inga Pudnika. 

Kruoslovys grafu Plāteru piļs komplekss – vīta romantiskom pastaigom i atpyutai. Piļs kompleksā dorbojās Kruoslovys Viesturis i muokslys muzejs, Kruoslovys nūvoda TIC, suveniru i vītejūs amatnīku darynuojumu veikals, porcelana leļu kolekceja i restorans. Amaklātuojim breivai daīmams piļs kompleksa parks, kur var apsavērt olu ar parka sorgu – lauvu, skotu platforma, lelformata skulpturys – grafu puors i rūtaļu laukums.

Odumovys dobys styga – cylvākim, kam pateik atpyuta pi dobys i aktiva izakustiešona, patiks stygys reļjefs, kas vad zamyn nu kolna i otkon augšan. Styga atsarūn dobys parka “Daugavas loki” teritorejā, tuos garums ir 1,8 km. Tī ir sastūpami rati augi i fantastiski skaisti kūki, bārnim patiks stygā nūsaglobuojušys kūka skulpturys dzeivnīku veidūlūs.

Laimis muzejs Indrā –pusstuņdis braucīnī nu Kruoslovys ir vīta, kurā sevkurs var justīs laimeiguoks. Laimis muzeja interaktivuo ekspoziceja raisa laimis sajiutu. Sūpluok muzejam atsarūn ari dobys styga. Itūgod Indra sovim gostim sagataviejuse ari jaunumu – tekstila labirintu. Laimis muzeja apmekliejums īprīšk juopīsoka, zvonūt pa numeri +371 20266514.