“Ausmeņa Records”, Bruolāns i “Cegly” izdavuši dzīsmi “Uzmini nu”
Rokstu sagataveja: portals lakuga.lv
Piec saleidzynūši lela puortraukuma apvīneiba “Ausmeņa Records” kūpā ar Bruolānu i “Cegly” juņa vydā izlaiduši jaunu dzīsmi ar nūsaukumu “Uzmini nu”.
Kai stuosta “Ausmeņa Records” puorstuovs Valters Murāns, dzīsme “Uzmini nu” tyka īraksteita jau pyrma pusūtra goda. “Dzīsme roduos, klausūtīs vysaidus bītus pi Jezupa studejā, nazkū frīstailojūt i teikūt leidz pīdzīduojumam. Kotrys saraksteja pa ostoņom ryndom, dzīsmis skaņu apstruodi veice muzikis i repers rolands če, poša dzīsme tyka īraksteita Rēzeknē,” skaidroj Valters.
Dzīsmei beja planavuots ari videoklips, tok suocēs Covid-19 pandemeja i nabeja īspiejis izveiduot klipu taidu, kaidu dzīsmis autori tū beja gribiejuši, deļ tam tyka nūlamts dzīsmi izlaist bez klipa, bet ar cereibu, ka iz prīšku izadūs nūfilmēt dzīsmei ari video formatu.
Dzīsme “Uzmini nu” saguojuse par autorim pošim. “Tys ir kai vaicuojums sev – uzmini nu. Da gola nikuo nasoku, da gola nikuo nadoru, par tū ka – uzmini nu,” nūsoka Valters.
