Sagataveja: portals lakuga.lv

Nautrānu pogosta puorvaļdis izsludynuotuo Jaunūs literatu konkursa, kas veļteits Pītera Jurciņa 89 godu pīmiņai, bolvu, 100 eiro, nominacejā “Dzeja” sajēme Inga Kaļva-Miņina, atzineibys bolva, 50 eiro, tyka padūta Marutai Avramčenko. Konkursa nūslāgums nūtyka 29. junī Rogovkys centrā, Pīterdīnys koncertā, iz kū kluotīnē tyka aicynuoti vysi konkursa daleibnīki.

Jaunūs literatu konkursa devize “Tu tymsumam par speiti, nes sovu gaismekleiti”, dorbi tyka vārtāti pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursa dorbu vierteišonys komisejā itūgod beja Anna Rancāne, Veronika Dundure i Ilga Šuplinska, informej Nautrānu sporta hallis-kulturys noma vadeituoja Inga Vigule.

Inga Kaļva-Miņina

***

Iz laukim
Jī atbrauce nu pošys golvyspiļsātys
Kab nūskaidruotu
Voi itamā pūra molā
Kūkim lopys pareizi bierst

Atbrauce, pasavēre, gudri parunuoja
Jaunajā ancukā pasagrūzeja
Pabiļdēja kūkus, lopu paraugus pajēme
Kab kvalitatis testu veiktu
Uzjēme biļdi iz prūda fona
Gordys vakarenis paēde
I gastiņcī nu saimineicys sajēme
breivūs vystu ūlys

Nu loba dzeive te laukūs
Jī saceja buordys slauceidami
A sovuos atskaitēs pīraksteja –
Brīvā lauku gaisa molekulu svārstības
ietekmē lapu krišanas ātrumu,
kas brīžiem ir nekontrolējams
un var izraisīt bīstami ātru rudens iestāšanos,
kas savukārt var strauji izplatīties visā valsts teritorijā,
tādējādi negatīvi ietekmējot kopējo Latvijas ainavu.
Ieteicams kokus novērot,
Ja rezultāti neuzlabojas,
Tad nāksies ķerties pie radikālākiem līdzekļiem,
Lai ierobežotu (nepieļautu) šādas patvaļīgas norises dabā.

***

Dzeivis nagludumus navar nūkaseit nūstyn
Kai zūbakmini nu zūbu
Šērvi nu uodys
Voi syunys nu akmiņa

Ar smiļkšpapeiru nūberzēt navar
Voi paglaudeit pa voi pret spolvu –
Jī pīsačer tovai dzeivei
Kai mozi dadzeiši kluotyn

Dzeivis nagludumi naprosa atļuovis
Kod atīt voi aizīt paceli
Jī ir kluot bez īlyuguma
I nikod nasoka
iz cik ilgu laiku
byus sūpluok tev

***

Tovs pasauļs miniaturā ekranā dzeivoj
I tev tys tik cīši pateik –
Tī vīgļuok ar draugim sasarunuot
Tī iz veikalu aizīt var
I nūpierkt vysu, kū gribīs
I vīdūkli sovu var paust
Par da sevkuru temu
I dūmubīdru byus daudz

Tovs pasauļs miniaturā ekranā dzeivoj
Kotru dīnu tu jū apgluosti
Ar pierstu golim
I leidza staipi
Kai suneiti mozu

Tymā mozajā pasaulī
vyss ir labi
Tik labi ka aizamierst
Cik virtuali naeists tī vyss

***

Dzymtys kūki vairs nalopoj
Kai mozi banzai kūceni
Aplīkti, ībalzamāti
Tymā kategorejā ar nūsaukumu “Reiz beja”

A beja reiz lelys saimis
I dorbs iz vītys reiz beja
Niu aizslāgtys školys
I pagaisuši cīmi
Apleik viņ nazuolis aug

Viņ divi vuordi –
“Reiz beja” –
Bet ītiļpeigi tik cīši
Tymūs dzeive kai upe
aizskriejuse
I atpakaļ atsaucama
Vairs nav

***

A nikas jau nanūteik –
Vakaņču nav i nabyus
Nūdūkli aug i pīaugs
A penseju sūlejumi – tuos ir puosokys
Ar na tik laimeigom beigom

Izkuopt nu sovu rāmu
I uzlyktu barjeru
Mes varim, ka labi gribim
Bet izkuopt nu Zooma lūdzeņu
Pasauļs naļaun i prūjom nalaiž

Dzeive iz pauzis izlykta

Tu meklej tū magiskū pūdzeņu
PLAY
Bet nav i nabyus –
Tān cytaižuok juodzeivoj byus

***

Muna Zīmyssvātku egleite
Ir kosmopolita
Lampenis nu Kīnys
Bumbuli nu Pūlejis
Viertyine, speiduli, breinuma sveceitis
Ari nu cyturīnis ir vastys
Speid i laistuos vysā kruošņumā
Kai Brazilejis karnevala princese

Ubi bene, ubi patria
Jei soka i pīcārt ar kuoju
Kod teik syltajā ustobā

Ladapučis

Ladapučis nūzīd uotri
Tod, kai sauliszači ruotni
Ladapuču boltūs zorūs
Rūtaļuos īt lelūs borūs

Sauliszaču muomuleite
Spūžuo, syltuo sauleite
Meili pučem pīsaskar,
Bet tuos strauji sasatryukst

I par lūga vaigu soltū,
Nūsnygušu cīši boltū,
Nūbierst seikys asarenis –
Ladapuču zīdlapenis.

***

Leits ar palākim kreitenim
Lūgā sveitrenis zeimej
A tu kai bierneibā verīs
Lūgā aizsveidušā
I sovu puosoku zeimej

I saplaukst tī breinuma pučis
I muokiuni apleik skrīn
Lelu sauli tu izzeimej
I smaideigus cylvākus

Kod aizsveist lūgs
Nu jauna vyss suocās –
Leits nu vīnys
A tu nu ūtrys pusis zeimejat
I kotram ir puosoka sova

***

Zīma ir muokslineica –
Jei zeimej pučis lūgūs
Taisa selfijus snīga spīgeļūs
I grīž piruetis
Ar ladu puorstīptūs prūdūs

Smolkys latakys izvyrpoj
I pīleimej jumtu molom
Snīgpuorsleņu grafiti sazeimej
Iz sūlenim i kūku zorūs

Juos meiluokuo kruosa ir bolta
I bolts tūp pasauļs vyss –
Tī sasateik sapni i prīks
Kas daleip i cylvākim

Maruta Avramčenko

Atej tod

Atej, kod acs ar muokulim pylnys,
Atej, maņ pīdereigus vuordus izsaceit,
Atej, kod nervi satraukti
Nu kotra nīka treis.
Atej, pat tod…

Atej, kod saule vierbā pyupolus gona,
Atej, kod vuordi īt lānai, bez steigys,
Atej, kod blokus spāka lasei nūkreit
Ari osorys lase.
Atej, pat tod…

Vari byut

Iz trotuara
ānu šyupys
zoru pynumus
kai krellis
svīž.

Saulis maleņa
vēļ moza
pyrms jei dīnā
lejās.

Taids jūceigs
tu izaver,
a moš, ka vystik vari
byut kaidam
godnys.

Mīrs juosorgoj

Kod vokora saule
Skumeiguoka palīk,
Tu kluseņom šveiksti
Par tū laiku
Kas sagaida myus.

Kaidam itamā vītā juopalīk,
Kaidam ite mīrs ir juosorgoj.
I juosagloboj taids,
Kaids tys radeits.

Izaicynuojums

kod ekrana vydā zibēt suoce
koordinašu burti i cipari spūdri,
pīteik ar dažim klikškim
lai vyss nūtyktu
lai vyss grīztūs –
dīnys nūtikšonys
vuordu upē padzirdēt
kai gruomotys lopys škiert
seiki kū seiki vysu izstuosteit
i izaicynuojumu liktiņam svīst

Vysys lobuos lītys

Ite mes dzeivojam,
ite mes mīļojam.
Tu saškurynoj maņ
pruotu i motu sprūgys.
Sirds tuktīņūs klausūs.
Mes steidzamēs
prīcu daleit.

Itys vēļ nav vyss.
Vysys lobuos lītys
niu kūpā īt –
vys teiruok i teiruok skaņ
dzīsme mīlesteibai
daudzajūs bolsūs.

Mīlesteibys rūzis

Rūžu smuorda vierpuļūs
muna rūka
tovā pagaļvī
napīkiust.

Stuosts par laimi
izdzeivuots divatā,
boltuos motu sprūgys
vēļ reizi nūpleivinej.

Salosu zīdzu lapenis
i kaļteju sauleitē.
Tys, kū
apspeid gaisma,
palīk par gaismu.

Kab byutu sylts

Atīt soltī zīmys reiti
Čiteņu ar bārza tuosi aizkuru
Kab byutu sylts

Paleigā vēļ matās saulis spaiti
Caur aizkorim ustobā tī īsalavej
Kab byutu sylts

Aiz lūga dzieržu putnus vydžynojam bolsūs
I sovam prīcys saucīņam es dūdu vali
Kab byutu sylts

Tod mozūs putneņus es suocu baruot zīmā
Lai nasabeitu jī da mane īt cīmā
Kab byutu sylts

Cārmyušku prīca

Kaidys sorkonys ūgys
itymā parkā dzeivi sviņ –
tī tok šūreit izbuorsteita
cāmyušku prīca.

Tu pasmaidi maņ
pyrms īmam.

Spuorni šveikst

ir tok saceits šudiņ
ka siermā kūkā
spuorni jau šveikst
kai elpys viļcīņs
bezgaleigs

nakavej putnu
jī perekli taisa

Dziļumūs

Lai es asu vaca,
Tī tovuos jaundīnuos,
Tu jau nazini, svešuo,
Ka ir taids vuords – “Lobreit!”
I duorba dīna kūpā juonas.

Es sovā dzilīnē
Kai zemē cītā kapačojūs.
Skumeigais Gaismā puorsamej.
Svešuo, tovai līkuleibai pīdūdu –
Raksteišu es saulei viesti.

Dūmai pateik klejuot

Kū tekalejūt skudrys,
Nu gaismys leidz timseibai
Muok smiļktīs īraksteit?
Īduodai pateik blūdeit
Tai ilgi, ilgi…

I tu pasaver
Pa labi i pa kreisi,
Kur sovys rūkys dalikt vari –
Itys duorzs kasdīnys
Saulē siļs…

Sūlim skanūšim

saule izaliejuse
kai ūlu dzaltonums
i es apmaucu
kuojuos gaismenis
ar sūlim skanūšim
kai muzyka
sleidu pretim
dobys dailei

Draugim byut

ir reits i puori
viļņs zaļs vielīs
myusim tik na moz
juopuorrunoj vēļ vys
atīsmē verūtīs

draugim byut
cyts cyta
placu jiutūt
paleidzēt i dūt
napraseit atpakaļ

Zīmu puorcīst

kod vysa zīmeiguo doba klusa
a vys tik pylna pīpiļdejuma
ruoda i apreibuse zīmys saulē
cik vysaiduos kruosuos gon
maņ muns nūlīcīņs ruoduos
i nazynuoju es ka var
tik špetns trikmīņs dzimt
zīmu puorcīst bez gaudu

Aizjimteibys ryupēs

kod līkuleibai
pretim īmu
vyss ir tik tyvu

i ar stypru lobu vali
ari vuojais var
paruodeit vari

aizjimteibys ryupestūs
naatlīk laika
vaicuot īnaidnīku

Mīlesteibys dzierksts

tovā sūlī
mīlesteibys storuojums
tī syltī vuordi naizgaist
kurus kasdīnā tu soki
ar dešaveigu devieja smaidu
tu pīstoroj dzeivi
ar mīlesteibys elpu
kotru sasiļdeit sniedzīs
i vīnkuorši taipat
prūti duovonuot prīcu

Tai gribīs

Tai gribīs tik atbreivuoti
Skrīt viejam leidza
I aizdzonuot muokūņus.
Tik teiri, teiri smītīs
Zaļajā dobys mīrā.
Kod mīlys saulstors bučoj,
Nu līsmainuos ļustis
Vosorys zīdi verās,
Dzeiveibys straume
Sovu dziļumu atkluoj…

2021. gods 29.juņa Pīterdīnys koncertu Rogovkā var nūsavērt ITE.