Roksta autors: portals lakuga.lv

Daugovpiļs konkursā par Eiropys Kulturys golvyspiļsātys 2027 (EKG 2027) nūsaukumu kūpā ar Jiurmolu, Līpuoju i Valmīru turpynoj saceņseibu ūtramā kuortā. Jau niule sevkurs var registrētīs par  “Daugavpils 2027” breivpruoteigū voi viestnīku. Kū dora taidi cylvāki i parkū tys ir svareigi Latgolai?

Daugovpiļs dasacejums konkursa pyrmajai kuortai ir vīneigais, kurs apvīnoj i īsaista vysu regionu. Ituo dasacejuma vadmotivs ir kūpeiga volūda, te apkūpuots ap 100 projektu ideju vysaidūs muokslys žanrūs ar plašu storptautysku muokslinīku leidzdaleibu. Ar tū var īsapazeit ITE. Dasacejuma muokslinīciskuos koncepcejis idejis autore ir latvīšu teatra i kinys režisore Krista Burāne, interveju ar jū skaitit ITE.

EKG programys veiduotuoji kūpeiguos kulturys volūdys mekliešonā, kūpradeišonā i runuošonā aicynoj byut leidzdaleigam sevkuru daugovpilīti i Latgolys īdzeivuotuoju – kai projektu ideju īsnīdziejam, pasuokuma leidzradeituojam, apmaklātuojam voi viestnīkam.

Par tū stuosta EKG konkursa dasacejuma izstruodis dorba grupys koordinatore Diāna Soldāne: “Piļsāta taidu dasacejumu nataisa tai, ka div cylvāki atsasāst i sadūmoj, kū tī varātu pīraksteit. Mums ir svareigs sabīdreibys vīdūklis, sevkura īdzeivuotuoja dūmys. Partū paradzāti kūpradis pasuokumi, ideju uzsaukumi, kur mes aicynojam īdzeivuotuojus izasaceit, kaidu grib redzēt Daugavpili piec septeņu godu. Sevkurs piļsātys voi regiona īdzeivuotuojs, ari cylvāks sevkurā vītā pasaulī var īsasaisteit breivpruoteigūs voi viestnīku kusteibā. Tim cylvākim pat nav juobyun fiziski kluot. Daudz kū var dareit elektroniski, dzeivē pat nasasateikūt. Taida ir jaunuo realitate.

Breivpruoteigī paleidz pasuokumu organiziešonā voi nu tehniski, voi satura veiduošonā. Sovutīs viestnīks ir lobūs viestu nesiejs. Jis digitalā vidē aktivi doluos ar informaceju par EKG 2027 dasacejuma topšonys aktivitatem, bet uzvarys gadejumā – tuoļuok par piļsātys i Latgolys regiona aktivitatem vyspuor. Myusu ziņa masu medejūs sasnādz nūteiktu cylvāku skaitu, caur viestnīkim varātu aptvert piec īspiejis plašuoku auditoreju. Ka mums, pīmāram, ir viestnīks Upītē, kas ir cīš aktiva vīta Zīmeļlatgolā, jis nūdūd ziņu sovam draugu, paziņu, apleicejūs lūkam. Asam saprotuši, ka daudzim itei ideja redzīs aizraujūša i interesanta, daudzi grib taidā veidā dorbuotīs leidza.

Viestnīks cytim stuosta ari par vierteibom, parkū tei voi cyta aktivitate ir vierteiga. Tys ir lobums Daugovpilei i vysai Latgolai

nu pīsadaleišonys itymā konkursā.” Par “Daugavpils 2027” breivpruoteigū voi viestnīku var oficiali registrētīs Daugovpiļs pošvaļdeibys sātyslopā.

Daugovpiļs EKG 2027 publicitatis materialus var vizuali atpazeit piec kūši ružovuos kruosys. Par tū Diāna soka: “Latgolys dečī itei kruosa ir, cytur puornūvodā pasaceitu, ka tī nav latvīšu deči. Bet mums jei vysaidu ītekmu īspaidā dečī tykuse.” Pādejūs mienešūs “Daugavpils 2027” “Facebook” lopā iz kūši ružova fona teik lykti citati par kūpeigu volūdu.

“Tī kūpeiguos volūdys stuosti ir nu cylvāku, kas koč kur jau īsaisteiti EKG 2027 dasacejuma izstruodē,” komentej Diāna. “Tī ir raksteitī, bet mes grybātu nu aktivu cylvāku izvylynuot ari taidus “stuostus”, kur kūpeigu volūdu izdoncoj, nūskrīn, izauž, sataisa rūku darynuojumā – kū nu kurs dora. Jūs mums var syuteit, ari rodūši pīīmūt. Vysi teik publicāti, kū sajamam. Mums byutu ari interesanti izzynuot, kas “kūpeiga volūda” ir taidam cylvākam, kurs da ituo nikuo nazynova par EKG 2027 konkursu. Ari taidu cylvāku dūmys mums ir svareigys.”