Sagataveja: portals lakuga.lv

Portals lakuga.lv pīduovoj video versejā atsavērt iz juņa nūtikšonom, kas bejušys saisteibā ar latgaliskū kulturu. Ūtrajā video raidejumā par školuotuoju vosorys kursim “Vosoruošona”, folklorys kūpys “Upīte” jaunuokū videoklipu i cytim jaunumim muzykā, junī izguojušajim izdavumim, Pīterdīnu Rogovkā i cytom viestim.

Ziņu saturs junī:

• nūtiks školuotuoju vosorys kursi “Vosoruošona”;
• Satversmis tīsys lāmums par Varakļuonu nūvoda īkļaušonu Rēzeknis nūvodā i pījimts latvīšu viesturiskūs zemu lykums;
• Rogovkā nūsvieteita Pīterdīna ar Jaunūs literatu konkursu i grupys “PusKapļi” koncertu;
• izdūta nūslādzūšuo gruomota par sakraluos arhitekturys i muokslys montuojumu Latgolā;
• folklorys kūpai “Upīte” videoklips dzīsmei “Gar upes molu staigoju”;
• jaunys dzīsmis grupai “Muosys” i apvīneibai “Ausmeņa Records”;
• izdūts 26. literaturys almanahs “Olūts”;
• pīduovoj bezmoksys paleidzeibu latgalīšu rokstu volūdā;
• pi klauseituoju atsagrīzs raidīroksts “Puslopys”;
• aicynoj pīsadaleit Latgolys apceļuošonys akcejā.

Pyrmais latgaliskūs kulturys ziņu raidejums “Kulturys viests” par nūtikšonom majā izskanēja juņa suokumā. Raidejuma vadeituojs ir kinys “Piļsāta pi upis” golvonuos, Aņša lūmys atveiduotuojs Dāvis Suharevskis.

Jau viestejom, ka portala lakuga.lv ir plans ir itaida formata viests gataveit reizi mienesī. Ziņu satura redaktore, portala lakuga.lv atteisteibys vadeituoja Edeite Husare soka: “Apsazynojūt, ka pi izvēlis skaiteit viests latvīšu literarajā volūdā voi latgaliski, vys tei gribiešona nav latgalīšu rokstu volūdys vierzīnī, bet video formats i eisa hronometraža ir veids, kai par latgaliskuos kulturys nūtikšonam varim izstuosteit plotuokai auditorejai, nūturūt tuos uzmaneibu.”

Kulturys ziņu eistynuošona ir projekta “Latgaliskā kultūrtelpa: problēmas, analīze, atspoguļojums portālā lakuga.lv” daļa, tū finaņsej Medeju atbolsta fonds nu Latvejis vaļsts budžeta leidzekļu. Par raidejuma saturu atbiļd latgalīšu kulturys ziņu portals lakuga.lv. Cikom īcarāti seši ziņu raidejumi, bet tiks maklātys īspiejis, lai itaida formata viests varātu turpynuot ari iz prīšku.

Portala lakuga.lv komanda soka paļdis par atsauceibu i atbolstu ziņu sataiseišonā raidejuma vadeituojam Dāvim Suharevskim, video operatoram i montažys režisoram Sergejam Čakānam, grafiku veiduotuojam Krišjānim Pleiko (Upes kinostudija) i Ivo Grigalim nu grupys “Latgalīšu Reps”.