Sagataveja: portals lakuga.lv

2020. goda golā Vaļsts kulturkapitala fonds (VKKF) izsuoce jaunys mierkprogramys kulturys medeju atbolstam eistynuošonu. Tikū nūsaslēdzs mierkprogramys “Kulturys nūzaris dokumentiešona” konkurss medeju atbolstam 2022.–2024. godā, kurymā finansiejums darbeibai trejim godim iz prīšku apstyprynuots ari latgalīšu kulturys ziņu portalam lakuga.lv.

Pasateicūt VKKF mierkprogramys “Kulturys nūzaris dokumentiešona” atbolstam 2021. godā leidza ar apreli piec puora mienešu pauzis lakuga.lv ar jaunu komandu atsuoce dorbu. Turpynojūt dūmuot par kulturys medeju stabilitati, tyka izsludynuots VKKF mierkprogramys projektu konkurss medeju atbolstam ari iz prīšku. Tymā finansiejumu darbeibai tuoļuokajūs godūs sajiems ari portals lakuga.lv. Projektu konkursā tyka īsnēgti 19 projekti, atbolstu sajiemuši 13 nu tūs. Īsapazeit par projektu konkursa rezultatim var ITE.

VKKF ekspertu komisejis prīšksādātuojs Jānis Uozuoliņš (Ozoliņš) par konkursu soka: “Treis godus iz prīšku konkursā finansātī medeji sajims garantātu atbolstu nu VKKF leidzekļu, nūdrūsynūt kvalitativu nūteikūšūs kulturys procesu līceibu saglobuošonu i reflekseju par tim. Mierkprogramā atbaļsteiti specializātī kulturys nūzaris medeji, kuru kvalitatis nūtureigums mierejams vysmoz treju godu grīzumā, i kuru pastateitī mierki treis godim iz prīšku īzeimej puordūmuotu atteisteibys strategeju. Jaunuo mierkprorama dūs ilgi gaideitū atbolstu specializātajim medejim, styprynojūt tūs kapacitati, ļaunūt planavuot darbeibu vairuokus godus iz prīšku.”

Portala lakuga.lv atteisteibys vadeituoja Edeite Husare, prīcojūtīs par konkursa rezultatim, atzeist: “Kai vīns nu portala darbeibys leluokūs izaicynuojumu īprīšk beja finansiejuma pīsaiste stabilai portala darbeibys nūdrūsynuošonai, i taisni jaunuo VKKF mierkprograma ir spieceigs atbolsts, lai portals var dareit iz prīšku. Ka īprīšk projektu konkursūs atbolstu īsadeve pīsaisteit videji pusgodu garam periodam, vysu laiku beistūtīs par portala spieju pastuovēt iz prīšku i dažaidu projektu konkursu īspiejom, tod jaunuo VKKF mierkprograma ir pyrmuo reize, kod zinim, ka niu drūsai varim byut, atsateisteit i viesteit par latgaliskuos kulturys nūtikšonom vēļ lobu šaļti iz prīšku. Asam cīši pateiceigi Vaļsts kulturkapitala fondam par itū atbolstu. Vēļ arviņ sabīdreibā gon volda prīškstots, ka vyss latgaliskais ir spiejeigs pastuovēt iz breivpruoteibys pryncypa, nu, kab nūdrūsynuotu sova medeja byušonu ilgtermeņā, ar breivpruoteibu ir par moz. Sagataveit viests, kurys tik rešu reizi portalam atīt latgaliski, nūdrūsynuot volūdys korekturu, puorlikšonu, autoru koordiniešonu, interveju, recenzeju i cytu rokstu sagataveišonu, kai ari viesteišona par tū vysu socialajūs teiklūs prosa intensivu kasdīnys dorbu. Taipat portalam vēļ ir daudzi ideju i sapynu, kai varātu popularizēt viests i informaceju par latgaliskuos kulturys nūtikšonom, kas gaida sovu eistynuošonys i atbolsta reizi.”

Pi portala satura, latgaliskuos kulturys aktualitašu informacejis pasaruodeišonys, kai ari lakuga.lv atteisteibys kai pošā portalā tai socialajūs teiklūs niu struodoj portala redaktore-žurnaliste, latgalīšu rokstu volūdys specialiste i literate Sandra Ūdre, žurnaliste Sintija Augustova i portala atteisteibys vadeituoja i socialūs teiklu redaktore Edeite Husare. VKKF daškiertais finansiejums 2021. godā (20 000 eiro apmārā devenim darbeibys mienešim) ļaun portala komandai struoduot pusslūdzē, paraleli raugūt atrast īspiejis cytūs projektūs ūtrys pusis slūdzis nūdrūsynuošonai. 2022. godā sajimtais finansiejums 12 mienešim byus 30 000 eiro, kas ļaus turpynuot portala komandys pusis slūdzis i pamatdarbeibys nūdrūsynuošonu.

Jau niu ar VKKF atbolstu portala komanda, ari pīsaistūt uorštata autorus, mienesī sagatavej videji 40 dažaidus rokstus – informaceju par gaidomom nūtikšonom, intervejis, receņzejis, apskotus, latgalīšu rokstu volūdys padūmys, kai ari jaunuokū literarūs dorbu publikacejis, spiej viesteit par latgaliskuos kulturys nūtikšonom socialūs medeju profilūs, kai ari dūt latgalīšu rokstu volūdys konsultacejis i padūmys interesentim.

Medeju “Latgalīšu kulturys ziņu portals lakuga.lv” uztur i darbeibu nūdrūsynoj bīdreiba “LgSC”, kura jau vaira nikai 15 godu eistynoj dažaidus ar latgalīšu volūdys saglobuošonu, atteisteišonu i populariziešonu saisteitus projektus. Portals lakuga.lv sovu darbeibu izsuoce 2007. godā, tys vys vēļ ir vīneigais medejs pasaulī, kura saturs teik sagataveits tikai latgalīšu rokstu volūdā – viesturiskā latvīšu volūdys paveidā.

Ar portala redakceju var sasazynuot, rokstūt info@lakuga.lv – teik gaideita informaceja par aktualitatem Latgolā i latgaliskajā kulturā vysā pasaulī. Latgaliskuos kulturys informaceju var skaiteit portalā http://lakuga.lv, kai ari sekuot leidza socialūs teiklu profilūs facebook.com/lakuga.lv, instagram.com/voluuda, twitter.com/lakuga, “Telegram” kanalā t.me/latgaliski, kai ari TikTok https://vm.tiktok.com/ZMdsUtS4G/.