Intervejis autore: Sintija Augustova, portals lakuga.lv

Naseņ portalu lakuga.lv “Instagram” profilā uzrunuoja Šons Khefets (Shawn Khefets), rokstūt, ka ir veics nalelu pietejumu par latgalīšu volūdu, kai ari izveiduojs video, kurā angliski stuosta gon par Latgolys viesturi, kulturu, medejim, kai ari dasadur latgalīšu volūdys gramatikai i cytom sovpateibom. Šons lobpruot pīkryta ari nalelai sarunai par aizaraušonu ar volūdom, gon ari par dorbu pi latgalīšu volūdys video. Ar Šonu “Zoom” sasarunuojom latvyski. Koč var saprast, ka latvīšu volūda nav Šona dzymtuo, mes vīns ūtra labi saprotom.

Kai aizasuoce tova interese par volūdom, taišni par mozuok zynomom volūdom?

Vysu sovu myužu asu bejs apleik vysaidu volūdu. Muni vacuoki ir nu Krīvejis, tok PSRS laikā jī puorsacēle iz Izraelu, tī es pīdzymu. Maņ beja varbyut pīci voi seši godi, kod mes puorsacēlem iz Latveju. Nu suokuma sātā es runuoju gon krīvyski, gon ebreju volūdā, piec tam Latvejā suoču vuiceitīs školā latvīšu i angļu volūdu.

Mani vysod ir interesiejušys volūdys. Gryuši pasaceit, parkū interese ir par apdraudātom i nazynomom volūdom. Es atsaceru, ka mani tys interesēja jau nu bierneibys. Maņ beja daudz gruomotu par geografeju, pasauli, skaiteju daudz par indianim (Amerikys pamatīdzeivuotuoji – S. A.). Piec tam studieju lingvistiku universitatē.  

Cik daudzuos volūduos tu takūši i puorlīcynnuotai runoj?

Niu tuos ir pīcys, kuruos es varu runuot par vysaidom lītom – krīvu, ebreju, latvīšu, angļu i spāņu volūdā.

Es apsavieru tovu “YouTube” kanalu, redzieju, ka esi izveiduojs daudzus video, kurūs apsaver vysaidys pasauļa volūdys. Voi tev jau ir kaida meiluokuo volūda?  

Nazynu, voi tei ir vīna volūda, bet varbyut volūdu grupa. Indiāņu volūdys mani cīši interesej, par tom nivīns nikuo nazyna nikuo, nav daudz informacejis. Maņ cīši pateik veikt pietejumus, lai izzynuotu vairuok.

Maņ cīši pateik keltu volūdys, tuos, kuruos runoj Īrejā, Skotejā, ari par latgalīšu volūdu interesejūs. Es gondreiž vysu dzeivi dzeivoju Latvejā, tok par latgalīšu i lībīšu volūdu izzynuoju tikai naseņ.

Kura ir bejuse poša sarežgeituokuo volūda, par kuru esi veiduojs video?

Dūmoju, ka Dena`ina (raksteits originalā – S. A.), tei ir Aļaskys indiaņu volūda. Maņ līkās, ka itūbreid jau mozuok par symts cylvāku tamā runoj. Nav daudz materialu internetā, lai veiktu pietejumu i vyspuor tū vuiceitūs.

Tai ir cīši daudzi sovaidu i sarežgeitu skaņu, cīši gryuši tuos izrunuot. Ari tuos gramatika nav leidzeiga nivīnai volūdai Eiropā, nivīnai nu tūs volūdu, kurys asu raudzejs vuiceitīs.

Cik daudz laika aizīt vīnam taidam volūdu video?

Vīnā desmit minotu video maņ ītylpst kaidys pīcys voi sešys lopys Word dokumenta teksta, tys ir ap 2000 vuordu. Tys ir cīši atkareigs nu tuo, cik daudz breivuo laika maņ ir.

Ir video, kuru es nu suokuma da gola izveidoju mozuok kai nedelis laikā, bet video par latgalīšu volūdu ir nūteikti muns garuokais video, tys aizjēme kaidus div mienešus.

Kas tevi mudynuoja veiduot video par latgalīšu volūdu?

Mani cīši puorsteidze, ka ir tik daudz lītu, kurys vysa latgalīšu kūpīna ir izveiduojuse – ir gon latgalīšu filmys i radeja, gon akceja “Latgalīšu volūdai draudzeiga vīta”, tys beja cīši interesanti, ka ir tik daudz vītu gon Reigā, gon Latvejā, gon ari uorpus Latvejis. Kū vaira es skaiteju, tū vaira atrodu vēļ materialus, kurus var īkļaut video.

Cīši interesanti tys, cik daudz vysa ir. Latgalīšu volūda nav tik lela, bet pi juos daudz pyulejušīs.  

Ar draugim kaidus treis voi četrus godus atpakaļ izzynuojom gon par apvīneibu “Latgalīšu Reps”, gon par vysaidom dzīsmem, myusim cīši patyka. Mes bejom jūs koncertā Rēzeknē. Es gribieju atbraukt iz Latgolu paintervēt cylvākus deļ video, bet nasaguoja laika.

Es caru, ka mozom i apdraudātom volūdom veiksīs, ka byus cylvāki pasaulī, kuri naaizmierss sovys volūdys i runuos jamā tik daudz, cik īspiejams, vuiceis tū sovim bārnim. Nav svareigi, cik moza ir volūda, golvonais, ka tū turpynoj runuot. Grybu turpynuot veiduot video i vairuot izpratni pasauļam par tū, ka itaidys volūdys eksistej, lai cylvāki tuos vuicuos.

***

Šona “YouTube” kanalu var atrast ITE, tok vysys saitis i olūtus, kū Šons ir izmontuojs video veiduošonai, var atrast i apsavērt ITE.