Rokstu sagataveja: portals lakuga.lv

Raiņa muzejs “Juosmuiža”, Preiļu nūvoda Turisma informacejis centrs i Aizkaļnis Tautys noms 31. julī 11.30 stuņdēs aicynoj dūtīs veloceļuojumā “Rainim pa pēdām”, 25 kilometru garumā īpazeistūt ar Raini saisteituos kulturviesturiskuos vītys, informej Raiņa i Aspazejis muzeja vadeituojis vītneica Solvita Kleinerte.

Veloceļuojums byus na tikai aizraunūšs i interesants breivdobys pasuokums, bet ari īspieja ceļuot laikā i telpā, īpazeistūt ar Raini i Juosmuižys apleicīni saisteituos kulturviesturiskuos vītys, objektus, legendys, nūstuostus i latgalīšu volūdu.Par jautru i uzmundrynūšu nūskaņuojumu vysā veloceļuojuma gaitā ryupēsīs Jurs Vucāns.

Ceļuojumā ar velosipedim tiks nūbraukts ainaviski skaists i kulturviesturiski interesants riņča maršruts (garums ≈ 25 km). Jis vad pa Preiļu nūvoda Aizkaļnis i Rušyunys pogosta glaznainajom vītom i īkļaun 11 kulturviesturiskus objektus – ceļuojuma pīturys punktus.

Maršruta gaita: Raiņa muzejs “Juosmuiža” aba bejušuo Juosmuižys muiža – Aizkaļnis seņkopi – Juosmuižys škola – Juosmuižys katuoļu bazneica – krūgs – Aizkaļnis pareizticeigūs bazneica – vīta, kur atsaroda ceļa stuļpeņš ar zemnīka vuordu Andrejs Rainis (vīta, kur Jānis Pliekšāns atroda sovu pseidonimu) – Muolaukys kolns – Rušyunys (Aglyunys) staceja – Šnepstu piļskolns (Lelais kolns) ar apmetni – ainaviski skaists lauku ceļš: Šnepsti – Aizkaļne – Raiņa muzejs “Juosmuiža”.

Velomaršruts i jamā īkļautī apsavieršonys objekti (pīturvītys) izvālāti, bolstūtīs Raiņa dīnysgruomotys pīrokstūs, juo sarakstē ar sietinīkim, laikabīdru atmiņuos, teikuos, legenduos i Latgolys kulturviesturis faktūs. Piec aktivi pavadeitys dīnys ceļuotuoji byus praseiti Juosmuižys parkā styprynuotīs ar aizkūdom, atsapyust i apmeklēt Raiņa muzeju “Juosmuiža”.

Ceļa sagums: velomaršruts vad pa cītū sagumu i pa grantātim celim ar zamu i videju satiksmis intensitati.Veloceļuojuma daleibnīki aicynuoti dūtīs ar sovim velosipedim, apsaviļkt atbylstūši laika apstuoklim. Napīmierstit pajimt leidza iudini, kab veļdzēt sluopis i kaidu gordāklu spāku atgiušonai!

Velobraucīņa organizatori prosa byut atbiļdeigim i īvāruot vysus vaļstī nūsaceitūs epidemiologiskuos drūšeibys īrūbežuojumus, lyudz pajimt mutis i daguna aizsagus, partū ka jī juolītoj i muzejā, i ari bazneicuos, kurys byus apsaveramys pa ceļam. Ari atguodynoj obligati īvāruot ceļu satiksmis nūsacejumus i lītuot aizsorgkiveris (bārnim da 12 godu juos ir obligatys). Sevkurs dalinīks atbiļdeigs par sovu drūšeibu i vecuoki par bārnu drūšeibu braucīņa laikā.

Daleiba veloceļuojumā i muzeja apmekliejums – 2 eiro. Obligata īprīškeja dasasaceišona da 26. juļa, zvonūt +371 29487589 ci rokstūt iz e-postu: jasmuiza@memorialiemuzeji.lv, veloceļuojums nūtiks, ka jam dasasaceis, mozais, 15 dalinīki.