Sagataveja: portals lakuga.lv

Itymā nedeļgolā, 31. julī i 1. augustā, Drycānūs byus apsaverama Lanys Kazlauskienis radeitūs fotoportretu izstuode “Es asu Drycani”, kurymā saplyust desmit Drycānu pogosta īdzeivuotuoju portreti i desmit apleicīnis ainovu biļdis, viestej Drycānu pogosta bibliotekys sagataveituo informaceja.

Lanys Kazlauskienis izstuode “Es asu Drycani” ir 2020. godā uzjimtys lelformata fotografejis, kurymuos vīnu vasalumu veidoj desmit Drycānu pogosta īdzeivuotuoju portreti i desmit ituos apleicīnis dobys ainovu i kulturviesturiskūs elementu, tymā skaitā arhitekturys, fiksacejis. Izstuode byus apsaverama pyrmū reizi i tei ir ari Lanys pyrmuo personalizstuode.

Fotografeju serejis autore, īpazeistynojūt ar izstuodis koncepceju, soka: “Muns dzymtais Drycanu cīms, vysa tycamuok, ni ar kū eipašu naatsaškier nu cytu, nu vys tik asu puorlīcynuota – ka vīnu i tū pošu ainovu apsaver tyukstūšom reižu i tikpat i vēļ vaira sūļu tīpat nūīt, itys godim kruotais redzis, taustis, dzierdis i cytu maņu pīredzejums nūsagulsnej, teik nanūviertejami skaists i sirdei tyvs. Tys teik par nūzeimeigu vītejuo cylvāka identitatis daļu. Taitod – lelu vierteibu. Diveju obrozu samontiešona vīnā nav nikas jauns, nu taišni itei tehnika maņ itūšaļt ruodejuos vysa pīmāruotuokuo, kab simboliskā veidā paruodeitu, kai apleicīne laika gaitā saaug ar cylvāku i ūtraiž. Koč i Drycanūs pastuoveigi nadzeivuoju jau aptyvai 20 godu, vys tik itys vidis i cylvāku pīredzejuma zeimūgs ir pamasts tik styprys, ka da ituo naasu atroduse taidys vītys, kur justūs tik pat labi i īdvesmys, spora pylna.”

Izstuodē byus apsaverami dažaidu paaudžu drycānīšu portreti, kurūs vydā: Imalda Kazuševa, Staņislava Kompa, Roberts Saksons, Silvija Laizāne, Māris Laureckis, Artūrs Eriņš, Ineta Veļičko, Regīna Ārmane, Antons Kindzuļs i Jānis Vespers. Bet Drycānu ainovys elementus serejai izaraudzejuse poša fotografe, nu itū izvēli ītekmiejs ari vītejūs īdzeivuotuoju paustais redzīņs par, jūspruot, zeimeiguokajom i šmukuokajom vītom Drycānūs. Biļdēs vīta atsaroduse kai obejim pogosta teritorejā dīvnomim, tai vydsškolai, Kakarvīšu piļskolnam, baronu Manteifelu eipašumu drupom, tai ari vairuokom cytom ainovom. Vysus izstuodis dorbus papyldynoj autoris eisi komentari.

“Es asu Drycani” atkluošona paradzāta 31. julī vīnūs piec pušdīņu pi plebanejis i tei byus apsaverama 31. julī nu 13.00 da 19.00 i 1. augustā nu 9.00 da 16.00.

Fotoserejis autore Lana Kazlauskiene kasdīnā struodoj sabīdryskūs attīceibu i marketinga sferā kulturys nūzarē, bet fotografeja ir breivuo laika nūdarbe, kuruos pamati īvuiceiti Profesionalajā fotoškolā Reigā, zynuošonys papyldynotys Reigys Stradeņa universitatis i ISSP školys studeju kursūs.

Izstuode “Es asu Drycani” kai originala Drycānu pogosta vizitkarte iz prīšku byus apsaverama interesentim ari cytuos Rēzeknis nūvoda vītuos. Fotografeju sereja eistynuota kai Drycānu pogosta puorvaļdis inicativa ar Rēzeknis nūvoda pošvaļdeibys Rodūšūs dorbu finansiešonys konkursā dabuotū finansialū atbolstu.