Rokstu sagataveja: portals lakuga.lv

Latgolys Kulturviesturis muzejā (LKM) nu 28. juļa da 29. augusta varams apsavērt fotografa Eduarda Utāna fotoizstuodi “Daudzveidīgā Latgale”, viesteits Rēzeknis piļsātys sātyslopā.

Fotografs Eduards Utāns dzeivis i dorba jubilejis godā – ituo gods septembrī byus opoli 30 godi, kai jis ir avīzis “Rēzeknes Vēstis” fotokorespondents, iz sovu dorbuošonūs fotografejis jūmā atsaver ar retrospektivu fotoizstuodi “Daudveidīgā Latgale”. Eduards dzims 1961. gods 1. aprelī Kruoslovys rajonā. Vuicejīs Rēzeknis 3. vydsškolā, piec tam – 14. Rēzeknis profesionali tehniskajā školā. Fotografiešonys muoku īsavuicejs Moskovys politehnikumā, kurū absolviejs 1987. godā, sajamūt fototehnika diplomu. Piečuok nakluotīnē studiejs Moskovys universitatis Fotožurnalistikys fakultatē.

E. Utāns aktivi pīsadola Rēzeknis i Latgolys fotografu izstuodēs, akcejuos i kūpeigūs plenerūs. 90. godu suokuos Latgolys kulturviesturis muzejā beja apsaveramys divejis juo personalizstuodis, kurymuos autors pīduovuoja muzeja apmaklātuojim na tik fotodorbus, nu ari sovus gleznuojumus abstrakcejis stilā. 2016. gods jubilejis izstuodei LKM beja atlasejs fotografejis, kas lyka seņ zynomus i parostus motivus īraudzeit neparostā gaismā voi pagrīzīnī.

Itamā jubilejis izstuodē varēs apsavērt fotografejis nu vysaidu laika pūsmu i žanru. Paguojušuo godsymta 80. godu fotodarbneicā veiduotuos malnboltuos fotografejis puorsameis ar myusdīnu digitalim attālim, kas atainoj autora prasmi izceļt i paruodeit gon vysaidys dobys nūskanis, gon cylvāku raksturus i kaisleibys.

LKM Kulturviesturis nūdalis vadeituoja Anna Līpenīte par Eduardu i juo izstuodi soka: “Pyrma daudzu godu TV kanalā “National Geographic” redzieju dokumentalū filmu “Fotografi”. Nu tuo laika iz itū profeseju verūs sovaiduok i fotoizstuodis muzejā maņ ir eipašys. Fotografi nūteikti nav “pluonuo gaļdeņa ūrbieji” i fotografeja reizem var cylvāka dzeivi puormeit cīš, cīš. Taida “eipaša” izstuode tveiceigā juļa izskaņā teik pīduovuota LKM apmaklātuojim – varēs vērtīs mums vysim pazeistamuo “Rēzeknes Vēstu” fotografa Eduarda Utāna retrospektivu fotoizstuodi “Daudzveidīgā Latgale”.

Autoram itys gods nūzeimeigs ar dzeivis i dorba jubilejom. Plyust laika upe… Soka jau, ka īkuopt divreiz vīnā upē navar. Fotografi var. Eduards sovā radūšajā dzeivē apstuodynuojs tyukstūšom i tyukstūšom laika ierkļu, īmyužynuodams jūs fotografejuos, kurys nas sovu viestejumu cauri godim. Izstuodē apsaveramys 60 interesantuokuos, nūzeimeiguokuos, spūdruokuos i skaistuokuos Latgolys fotošaļtenis. Īmūt cauri izstuožu zālei, radzams, ka fotografam pateik eksperimentēt ar kruosom i gaismu, te malnboltī dorbi nu fotokluba “Rēzekne” darbeibys laiku paguojušuo godu symta 80. godūs puorsamej ar kruosainom myusdīnu fotografejom. Piļsāta vysaidūs godalaikūs, mistiskys kusteibu fotografejis, sadzeiviski portretiejumi, meilu cylvāku i Latgolys personeibu portreti, fotografejis retro nūskaņuos…

Paļdis fotomuokslinīkam par skaisti padareitū dorbu, lai lūbās i vyss izadūd ari turpmuok! Atejte iz izstuodi!  Jei skateituoju ītyn dzymtuos zemis mīlesteibys apmetnī.”