Rokstu sagataveja: Sintija Augustova, portals lakuga.lv

Nu suoku 12. Latvejis Školu jaunuotnis dzīšmu i deju svātkim vajadzēja nūtikt pārņ – 2020. goda julī, tok pandemejis īspaidā tī izmaineitā i napīrostā formatā nūtyka itūgod. Laikā nu 12. da 29. juļam kotrā nu 43 Latvejis pošvaļdeibu ībrauce Svātku mašyna pyrmajā Svātku nūtykumā “Saulesvija”. Niu mašyna ir atsagrīzuse Reigā, Svātku “guojīņs” ir beidzīs, apsavaicuojom puora Latgolys kolektivu vadeituojim, kaidys ir sajiutys, īspaidi piec Svātku.

Rēzeknis 5. vydsškolys 5.–9. klašu deju kolektiva vadeituoja Inga Peļņa soka, ka taidi svātki naspiej radeit tū kūpeibys sajiutu, kū dūd reali svātki, dorbs ir padareits, bet gondarejuma eisti nav.

Upeitis bārnu Folklorys kūpys “Upīte” vīna nu vadeituoju Kate Slišāne par svātku natradicionalū formatu izasoka tai: “E-svātki beja golvonais īmeslis dorbuotīs i napasadūt gryutuokajūs laikūs, kod navarēja pat sasatikt, kod vysu vajadzēja dareit caur ekranu. Piec svātku beja lela gondarejuma sajiuta, ka bārni spēja sasajimt, ka jī nav zaudiejuši sovu sporu, ka jī ir ar mīru mestīs i dorbuotīs tuoļuok. Pats golvonais – e-svātki myusim deve īspieju kūpeigi samuzicēt i atrast seņ nagiutuos emocejis, kas paruoda tū, ka svātki ir tī, kur asam mes.”

Kruoslovys kulturys noma deju kolektiva “Raita” vadeituoja Valda Timule atzeist: “Nu vīnys pusis ir labi, ka ir koč kas, kai saceja bārni – vysmoz piec pusūtra goda mes varējom izpurynuot bruņčus i apviļkt tautystārpu. Mes saprūtam laiku, kurā mes itūbreid dzeivojom, tai ka nikuo lobuoka mes nagaidejom, bet, prūtams, ka tim dalinīkim, kas ir bejuši Dzīšmu i deju svātkūs, itī nabeja svātki, bet gon koč kaids pasuokums, kas asūšajā situacejā varēja byut organizāts. Dzīšmu i deju svātki ir Daugovys stadions, pylnys tribīnis, emocejis, kūpābyušona ar tyukstūšom dalinīku, tys, kū tu atdūt skateituojam, tys, kū sajem nu juo atpakaļ, tī ir tī svātki.”

Ituogoda Svātku koncepta mierkis beja cīnpylnai pabeigt Svātku procesu, naapdraudūt kluotīnis izgleiteibys procesa suokšonu 1. septembrī, kūpejū Svātku programu veiduoja 15 vysaidys nūtikšonys gon koru dzīduošonā, vokalajā, instrumentalajā muzykā, folklorā, dejā, vizualajā i vizuali plastiskajā muokslā. Vyss nūteikūšais tyka īmyužynuotys videoīrokstūs i paliks kai 21. godu symta i Svātku pandemejis laika līceiba nu kotra nūvoda, kurā pabejuse “Saulesvija” mašyna.