Rokstu sagataveja: portals lakuga.lv

Izdūdūt audio disku i aprokstu, jubilejis godā taps gūdynuots veiru kuora “Olūts” ilggadejais dirigents Juoņs Gruduls, kurs Dzīšmu svātku kuoru karūs reiz aizvede Latgolys veirus leidz augstuokajam sasnāgumam – 1. vītai veiru kuoru grupā, informej Stiernīnis draugu bīdreiba.

Seņ zynoms redzīņs par latvīšim kai dzīduotuojtautu. Seņ dajiukti i kasdīnā na vysod nūvārtāti Latvejis lelī goreigī duorgumi. Tok tei ir myusu dzeivis i kulturys telpa, tys ir myusu materialais i namaterialais montuojums, kas reiz sajimts nu tāvutāvu i reiz byus juonūdūd bārnubārnim. Vīns nu itūs duorgumu latvīšu kulturys vaiņukā ir kuoru muziciešonys tradiceja, eipaši izceļūt veiru dzīduojumu.

Latgolys veiru kuoru kusteibys calmlauzs J. Gruduls (1946) ir dzeivuojs i struoduojs Rēzeknē, itūšaļt atsagrīzs i dorbojās dzymtajā Stiernīnis pusē. Vysi juo vadeitī kuori izacāluši ar sovu skaniejumu gon nūvoda, gon vaļsts Dzīšmu svātkūs. Spūdruokuos puslopys saistuos ar veiru kuori “Olūts”, kurs dybynuots 1979. godā. Vysā 20 godu pastuoviešonys laikā kuora“Olūts” svareiguokais aizdavums ir bejs latgalīšu tautysdzīsmis, muzykys kūpšona i nesšona tautā, partū golvonū vītu kuora repertuarā ījēme sova nūvoda tautysdzīsme. Lela viereiba tyka veļteita ari Rītumeiropys i latvīšu klasikai.

Projekta “Vīru kora Olūts diriģenta Jāņa Grudula jubilejas disks “Pīmiņ, brōļ!” mierkis ir veiru kuoru dzīduošonys tradicejis ilgtspiejis atjaunuošona i uzturiešona; izgleitojūšu i saglobojūšu materialu veiduošona i publiciešona, īkļaušona myužizgleiteibā; izcylu dirigentu i pedagogu zynuošonu i prasmu tuoļuoknūdūšona i veiru kuoru kusteibys populariziešona Latgolā i Latvejā.

Projektu realizej Stiernīnis draugu bīdreiba sadarbeibā ar Latgolys regiona atteisteibys agenturu, Vaļsts kulturkapitala fondu i AS “Latvijas valsts meži”.