Roksta autors: portals lakuga.lv

Bolvu nūvoda Brīžucīms ir vīna nu nadaudzūs vītu, kam jau ir sova gruomota par pogosta viesturi i juos cylvākim. 28. augustā 15.00 stuņdēs, pogosta svātku laikā, tiks atkluota pogosta nūvodpietnīceibys ustoba par školys viesturi Brīžucīmā.

2016. godā izguojušuos gruomotys “Briežuciems” ITE autore Valentīna Kaša stuosta par īkuortuotū nūvodpietnīceibys ekspoziceju: “Itei ustoba byus veļteita Brīžucīma školys viesturei, pošu školu 2016. godā deļ mozuo bārnu skaita slēdze. Tī mes salykom školys mebelis, skapūs apsavieršonai sakuortuojom godim kruotūs vuiceibu materialus, bārnu pietnīcyskūs dorbus, vysaidus apkūpuojumus par pīsadaleišonu olimpiadēs, konkursūs, sporta saceņseibuos – diplomi i gūdaroksti. Eipaši interesanti materiali myusdīnuos ir nu pioneru organizacejis laiku – karūgi, vysaida veida padūmu atributika. Maņ ir salaseits gona daudz materialu ari par pogosta viesturi, bet tim byus vajadzeiga sova atseviška telpa, pagaidom struodojom pi školys materialu.

Tei ustoba atsarūn bejušuos Brīžucīma pamatškolys telpuos, pošā Brīžucīma centrā, kur pogosta puorvaļde. Tamā ākā suokumā atsaroda padūmu saimnīceibys “Briežuciems” kantors. Kod sovhozus likvideja, telpys stuovēja tukšys, bet Brīžucīma pamatškola tūlaik atsaroda vacuos telpuos lobu gobolu nu pogosta centra. Tyka nūlamts kantora āku pīmāruot školys vajadzeibom. Izcēle pībyuvi, 1997. godā mes, škola, īguojom itamuos telpuos. Leidz sliegšonai 2016. godā te dorbuojuos škola. Tān te atsarūn pogosta puorvaļde, vairuokys telpys izmontoj tautys noms, bet div telpys stuovēja naaizjimtys. Vīnā nu jūs tod ari ir palykuse par nūvodpietnīceibys ustobu ar školys viesturis ekspoziceju.”