Rokstu sagataveja: portals lakuga.lv

Viļakys Jezus Sirds Rūmys katuoļu bazneicys vitražu restauraceja tyvojās nūslāgumam, viesteits Viļakys Jezus Sirds Rūmys katuoļu draudzis sātyslopā.

Viļakys bazneica teik saukta par Zīmeļlatgolys gotikys pērli i itūgod svietej 130 godu jubileju. Bazneicys interjeru papyldynoj ornamentalu vitražu ansamblis nu 1911. gods, kas 2006. godā suokts pakuopeniski restaurēt, saceits Rūtys Kaminskys i Anitys Bisteris monografejā par sakralū montuojumu viesturiskajūs Bolvu i Ludzys rajonūs.

Nu 2020. gods septembra draudzei izadevs pīsaisteit 21 632,51 euro, kab atjaunuotu septeņus bazneicys lūgus ar vitražom. Tān dorbi nūteik pi pādejūs četru – ūtruo stuova telpuos pi centraluo oltora, lobajā i kreisajā pusē.

Jau nūsaslāguse bazneicys centraluos pusis vitražu restauraceja, nūzeimeiguokuo nu jūs – sv. Mateja vitraža viers īejis durovu pa labi. Juos centrā ir radzams eņgeļa tāls i svātuo vuords ir attāluots latiniski. Viļakys katuoļu draudzis vīni nu leluokūs svātku ir Sv. Mateja svātki, kura pīminis dīna ir 21. septembris. Bazneicā pi Dīvmuotis oltora kreisajā pusē atsarūn sv. Mateja skulptura. Ari Viļakys piļsātys kopsāta teik saukta par Sv. Mateuša kopsātu.

Vysu septeņu vitražu restauracejai beja vajadzeigi 21 500 euro, atlykušuo summa tiks izlītuota atkluošonys pasuokumam. Draudzis prāvests Guntars Skutels vysleluokū pateiceibu soka Kulturys ministrejai i Viļakys nūvoda dūmei par pīškiertajim leidzeklim, kai ari atbaļsteituojim Pūlejā i Italejā, draugim vysā Latvejā i draudzis lūceklim. Ka kaids grib atbaļsteit Viļakys Jezus Sirds Rūmys katuoļu draudzis aktivitatis, tod varams zīduot: Viļakas Jēzus Sirds Romas katoļu draudze, reģ. nr.: 90000450413, konts: LV33UNLA0050010527958

Par vitražu atkluošonys pasuokumu byus zynoms vāluok.