Rokstu sagataveja: portals lakuga.lv

Nedelis, kod kalendars cīš nasamīdz viersā ar jubilejom, atzeimojamom dīnom, svareigom nūtikšonom, lai atstuojam izalaseišonom aiz prīcys. Vīnkuorši – partū ka pateik. Taidi ari ituosnedelis kulturys īsacejumi nu Evikys Muizniecis – literatis, muokslineicys, latgaliskuo entuziastis.

Apvīneibys TKP aba “Tā kā pērn” dzīsme “Sveķu celma galīnā”

Maņ cīš, cīš pateik folkmuzyka – jamā ir koč kaids nasaprūtams spāks, kas līk izslīt mugoru taišni. Apvīneibā TKP dorbojās mums meils draugs i cīš talanteigs muziks Ēriks Zeps kūpā ar līvu kulturys nesieju Julgī Stalti. Īsoku likt iz austeņom i laist skali sevkurā šaļtī, kod vajag spāka i vīnkuorši lobys muzykys. I tei vejūle…

Laivuošona pa Laucesys upi

Sportiskys aktivitatis vysod ir super, i laivuošona ir eists pīdzeivuojums! Latgolā ir braukts pa skaistuokom upem, bet Laucesa (suocās Zarasūs i Daugovpilī ītak Daugovā) maņ beja puorsteigums – nu mīreiga rytuma pa glaznainom vītom cauri mežim i sakūptim vasarneicu rajonim da piļneigim džunglim ar gona nūpītnu škieršļu jūslu pa vydam. Latgola ir breineiga! I upē iudiņs vysod teirs i skaidrs.

“Akmiņs ols” ar meistaru Juoni Malķeviču

Jā, jā, drupeit pošreklamys, bet eistyn pateik, kai saguoja gon poša kina, gon ari ols meistars i juo stuosti i pīredze. Cyta storpā, miseja saglobuot itū ols dareišonys trediceju ir izpiļdeita – ar draudzini Andu piec fiļmiešonys bejom cīš lelā azartā paraudzeit tū izdareit pošys, zlaukta vītā dabuojom vacu čuguna vannu i rezultatā jau divejis reizis asam tykušys pi sova akmiņs ola!