Rokstu sagataveja: portals lakuga.lv

25. septembrī 14.00 stuņdēs Preiļu Viesturis i lītiškuos muokslys muzejā konkursa izstuodis “Jāzepa Pīgožņa balva Latvijas ainavu glezniecībā” atkluošonā svineigi tiks paziņuots 2021. gods golvonuos bolvys īgiviejs, informej Preiļu Viesturis i lītiškuos muokslys muzeja specialiste viesturis vaicuojumūs Ilona Vilcāne.

Itūgod konkursam tyka padūti 103 muokslinīku 174 dorbi. Nu jūs izstuodei žureja izraudzeja 88 autoru dorbus. Izstuodis atkluošonā 11. augustā Reigys Sv. Pītera bazneicā tyka paziņuoti 2021. gods golvonuos bolvys nominanti. Golvonajai bolvai nomināti ir seši muokslinīki: Meldra Bula par dorbu “Jūlijs”, Jānis Ziņģītis par dorbu “Janvāra sākumā”, Osvalds Zvejsalnieks par dorbu “Rudens vēji”, Agnija Ģērmane par dorbu “Sapnis, kas atkārtojas 2”, Ērika Kumerova par dorbu “Pavasara jūtoņa”, Inga Jurova par dorbu “Svētdiena. Kailsals”.

Reigys Sv. Pītera bazneicā izstuode apsaverama da 17. oktobra, septembra vydā izstuodis ekspoziceja tiks puorkuortuota, lai daļu dorbu aizvastu iz Preilim.

Itūgod žurejā dorbus vērtēja: žurejis prīšksādātuoja, glaznuotuoja Agra Ritiņa (“Jāzepa Pīgožņa balvas Latvijas ainavu glezniecībā” golvonuos bolvys laureate 2020. godā), Latvejis Muokslys akademejis profesors, glaznuotuojs Aleksejs Naumovs, muokslineica Laura Pīgozne, Preiļu Viesturis i lītiškuos muokslys muzeja ekspoziceju i izstuožu kuratore Silvija Berezovska, muokslinīki Anda Munkevica, Jānis Strupulis i Einārs Kvilis.

Kai sovā uzrunā pīzyna žurejis prīšksādātuoja Agra Ritiņa: “Žurejis dorbs beja raits i samārā vīnbaļseigs. Viertiešona nūtyka pateikamā sovstorpejuos komunikacejis gaisūtnē.”

Reigys dūme i Preiļu nūvoda dūme, sadarbeibā ar Reigys pošvaļdeibys kulturys īstuožu apvīneibys Reigys Sv. Pītera bazneicys puorvaļdi, Preiļu Viesturis i lītiškuos muokslys muzeju i idejis autorim – kinorežisoru i glaznuotuoju Juoni Streiču, muokslinīkim Jāni Anmani i Jāni Strupuli, 2015. godā  īrūsynuoja i īdybynuoja Jezupa Pīgožņa bolvys pīškieršonu par lobuokū dorbu Latvejis ainovu gleznīceibā, kab atteisteitu i popularizātu Latvejis ainovu gleznīceibu, kai ari vīnuotu Latvejis golvyspiļsātys i nūvodu kulturys dzeivi.

“Jāzepa Pīgožņa balvas Latvijas ainavu glezniecībā” izstuode i bolvys padūšona nūteik jau nu 2015. gods. 2015. godā golvonū bolvu sajēme Latvejis Muokslys akademejis profesors, muokslinīks Roberts Muzis, 2016. gadā – muokslineica Silva Linarte, 2017. gadā – muokslinīks Aldis Kļaviņš, 2018. godā – muokslinīks Jānis Plivda, 2019. godā par konkursa laureatu palyka muokslinīks Nugzars Paksadze, 2020. godā – Agra Ritiņa.