Rokstu sagataveja: portals lakuga.lv

“Ausmeņa Records” repere “Ūga” sadarbeibā ar dzīduotuojom Dināru Rudāni i Patrishu izdavuse jaunu dzīsmi ar nūsaukumu “Pāries”, kai ari izruodejuse Rēzekni raidejumā “#PiecasKartes”.

Daiga Barkāne aba Ūga par dzīsmi stuosta tai: “Maņ vīnu dīnu pīraksteja Dināra ar pīduovuojumu pīsadaleit nastandarta dzīsmē. Kod pyrmū reizi nūsaklauseju, izreiz saprotu, ka dzīsme nav kai radejis standarta hiti, bet dūma ir dziļuoka i maņ cīši tyva.”

Ūga soka, ka izreiz saprota, par kū raksteis i kū izceļs sovā partejā. “Dzīsmi nu molys radzu kai puors minotu, kod apsastuot i īviļkt elpu, saprast, ka tys vyss jau varbyut pat reit puorīs,” skaidroj Daiga.

Taipat Ūga ir prīceiga par sadarbeibu ar Dināru i Patrishu. Repere stuosta, ka sadarbeiba beja cīši breiva. “Sovā pantā vairuok izcieļu sīvišķū spāku, spieceigys sīvītis ir vysur!” puorlīcynuota ir Ūga.

Dzīsmē “Pāries” Ūga sovu pantu dzīd latgaliski, tok tī, kas grib dzierdēt Ūgu runojam latvyski, var apsavērt pavysam naseņ izguojušū raidejuma “#PiecasKartes” ūtruos sezonys nūslādzūšu epizodi, kurā Daiga kūpā ar “Latvijas Radio Pieci” personeibu Lindu Samsonovu izstaigoj vysaidys Rēzeknis vītys i izskaidroj, kas ir “čūksts”.

Daiga stuosta, ka jom ir guojs koloriti. “Nūliemu, ka pīīšu tam drupeit nanūpītnuok i izvoduoju pa nastandarta vītom. Redzīs, ka guoja samārā forši, es vysod asu gotova i atvārta gostim. Pošai beja vareiba pastaiguot pa rajonu drupeit sovaižuok, lānuok. Nasaverūt iz traumu, lānim tempim atsagrīžu vacajuos slīdēs,” ar emocejom doluos Ūga.