Rokstu sagataveja: portals lakuga.lv

Bīdreiba “Rogovkīši” planavoj īmyužynuot i popularizēt Latgolys regionā pazeistamuokuo metalkaļva Juoņa Ļubkys dailradi – tops videostuosts, kuru veidoj Ivars Zviedris, i digitalais fotoalbums, informej bīdreibys puorstuove Terēze Kūkoja.  

Tautys dailomota meistars Juoņs Ļubka ir pazeistamuokais metalkaļvs Latgolys regionā, kura meistareigī metala kolumi ir pazeistami Latvejā i uorpus juos rūbežu. Koč ari sovā kaļva dorba myužā nu 1970. gods ir struoduojs ar miseņu, kaparu, bronzu i melhioru, pādejūs godūs jis pīsagrīzs viņ dzeļžam. Sovu rūkrokstu Juoņs Ļubka ir izveiduojs, studejūt meistaru tradicejis i īvīšūt poša radeitus jaunynuojumus. Meistars ir darynuojs vysaidus sadzeivis prīškmatus – puču turātuojus, pakaramūs, komyna pīdarumus, gaismys lukturus i lustrys, pa reizei krāslus, smolkus spīgeļu ītvorus, vieja ruodeituojus i īspaideigus svečturus. Vāluok, 90. godūs, seviškā cīnā beja karūga turātuoji i komyna pīdarumi. J. Ļubkys darynuotī matala kolumi eksponāti daudzuos izstuodēs Latvejā, ari Pūlejā, Krīvejā (Moskovā, Vladivostokā), Vuocejā, Suomejā i Japuonā, kai ari puordūti daudzūs godatiergūs Latvejā, Vuocejā, Pūlejā.

2022. godā metala kaļvs J. Ļubka svinēs sovu 80 godu jubileju. Juo kaļva smēde jau vairuok nakai 30 godus atsarūn Rēzeknis nūvoda Nautrānu pogosta Zaļmuižā. Tok meistara ilguo kaļva dorba myuža veikums nav apzynuots i vīnkūp dokumentāts.

Andris Ozoliņš par jū roksta portalā la.lv: “Eistuo dzeļža kaļva omota meistareibu daboj viņ ar godim, kod kaļva tehniskuo variešona palykuse automatiska i var pīsagrīzt plastikys niansem. Tai struodoj Dzeļža kaļvu giļdis aristokrats, Tautys dailomota meistars Juoņs Ļubka. Solidais dorba stāžs i meistareibys leimiņs jū ļaun saukt par lelmeistaru.” (2016, 30. apr.)

Tautys dailomota meistars Longīns Švirēvičs, Tautys studejis “Cilnis” vadeituojs: “Kaļva meistaru Juoni Ļubku bīži radzu – Kaļvu dīnuos, Senejūs omotu dīnuos, godatiergūs i Vērmaņduorzā. Vysod prīcojūs par juo dorbūs jiutamū lobū orūda školu, precizitati i funkcionalitati. Vacuos školys meistari čikus nataisa!”

Itymā projektā tiks dokumentāts kaļva J. Ļubkys dorba process, jū filmejūt i izveidojūt video sižetu, apzynuoti i fotografāti ilgajā dorba myužā izkoltī dorbi (metala kolumi), izveiduots juo dorbu digitalais fotoalbums, popularizātys kaļva omota prasmis, video sižetu i digitalū fotoalbumu īvītojūt dažaiduos škārsteikla vītnēs.

Meistaru dorba procesā vosorā jau nūfilmēja dokumentalūs filmu režisors Ivars Zviedris.  Pošreiz nūteik dorbs pi video sižeta izveiduošonys. Ir apzynuotys J. Ļubkys ilgajā dorba myužā darynuotūs nūzeimeiguokūs i interesantuokūs kolumu atsarasšonys vītys tyvuokā i tuoluokā apleicīnē. Itūs dorbus fotografēs i digitalū fotoalbumu veiduos pīredziejušais fotografs Aleksandrs Lebeds.   

Metalkaļva Juoņa Ļubkys dailrade teik īmyužynuota projektā “Metālkalēja Jāņa Ļubkas daiļrades dokumentēšana un popularizēšana”, kurs dabuojs atbolstu Latgolys kulturys programys 2021 projektu konkursā.