Rokstu sagataveja: portals lakuga.lv

TV raidejuma “Īstās latvju saimnieces” jaunajā sezonā, kurys pyrmais raidejums TV ekranūs pasaruodeis jau 9. septembrī, septenis saimineicys nu vysys Latvejis sasaceņss par šova golvonū bolvu i lobuokuos saimineicys titulu. Div nu septeņu saimineicu ir nu Latgolys – Vija Kuļša nu z/s “Kotiņi” Bolvu nūvoda Škilbānu pogosta i Viola Anna Bīriņa nu pūdnīku darbneicys “Cukrasāta”, Rēzeknis nūvoda Ūzulainis pogosta Bekšūs.

Saimineicu aizdavums raidejumā ir īgiut puorejūs saimineicu lobvieleibu i tikt pi vysvaira punktim, ruodūt sovu kulinarū meistareibu, kai ari prasmi izklaideit gostus. Saimineica, kura sezonys beiguos byus īgivuse vysleluokū atbolstu i vysvaira punktu nu puorejūs, sajims raidejuma golvonū bolvu – 1000 eiro i lobuokuos saimineicys titulu. 

Pyrmajā raidejuma “Īstās latvju saimnieces” serejā gostus sovā saimisteibā gaideis saimineica Viola Anna Bīriņa nu “Cukrasātys”. Viola Anna izruodeis sovys keramikis prasmis, kai ari prīcēs gostus ar prīkšnasumu sovā duorzā.

Vēļ raidejumā sovys saimnīkuošonys i izklaidiešonys prasmis izruodeis Vija Kuļša nu z/s “Kotiņi” Bolvu nūvoda Škilbānu pogosta, Rūta Beirote nu Krimuldys apleicīnis, Līga Lieplapa nu Modūnis nūvoda, Gunita Štorha nu Kuldeigys apleicīnis, Kitija Švīgere nu Kandavys i Sandra Icaka nu Rundālis nūvoda.

Ari īprīškejuos raidejuma sezonuos ir pīsadalejušs saiminīcis nu Latgolys – Sandra Viša, Vija Kudiņa, Aina Barsukova, Sarmīte Stepiņa, Ilze Stabulniece.

TV raidejuma “Īstās latvju saimnieces” jaunū sezonu nu 9. septembra catūrtdinēs 21.05 stuņdēs varēs redzēt kanalā LTV1 i replay.lv. Taipat datikt varēs ari pi saimineicu recepšu, kas tiks publicātys sabīdryskūs medeju portalā lsm.lv.