Kulturys īsacejumi nedeļai: Ontona Rupaiņa romani i vītys, Raiņa ailis
Rokstu sagataveja: portals lakuga.lv
13. septembrī Bieržgaļa pogostā piec vacuo stila 1906. godā pīdzyma rakstnīks, kordirigents, režisors Ontons Rupaiņs, itūgod jam – 115. Juo dzimšonys dīnu bierzgalīši ari atzeimoj 13. datumā, nariekinojūt piec jaunuo stila. Partū nedelis kulturys īsacejumus uzticējom Bieržgaļa pogosta Ontona Rupaiņa muzeja vadeituojai Skaidrītei Apeinānei.
Romans “Zemes sōļs” ci “Tauta grib dzeivōt”
Romanā “Zemes sōļs” tāluotys 20. g. s. 30. godu nūtikšonys, jis sasasauc ar myusdīnom – koč voi vieliešonys. Ka grib kū vairuok izzynuot par Latgolys kulturviesturi, tod – īsoku romanu “Tauta grib dzeivōt”.
Rupaiņa vītys Bieržgaļa apleicīnī
Īsoku atīt iz muzeju, kur tyvuok īsapazeit ar juo dzeivi tepat Latvejā i vāluok emigracejā. Tod var apmeklēt Bieržgaļa bazneicu, tepat Bieržgaļa kopsātā apsaverams juo pīmineklis iz kopa, 13. septembrī 10.00 stuņdēs paradzāta pīminis šaļteņa kopsātā.
Ka runoj par viesturiskim objektim, kas apraksteiti Rupaiņa dorbūs i atmiņuos, turistus interesej Kirkys kolns, Bieržgaļa muiža, Bieržgaļa apleicīnis azari. 13. septembrī mums ir paradzāta ekspresizstuode – Ontona Kūkoja pasteļu ciklys “Ontona Rupaiņa zeme”.
Dzejis dīnu aktivitate “Mans Raiņa dzejolis”
Septembris mums ir na viņ Rupaiņa, bet ari dzejis mieness, O. Rupaiņs sovu literarū dailradi suoce ar dzejūļu raksteišonu. Pi skūlys, lapinis teritorejā, ir specials vidis objekts. Skūlāni, pogosta īdzeivuotuoji, sevkurs interesents var iz auduma pīraksteit sovys meiluokuos Raiņa dzejūļu ailis, tū īveit kūpejā dzejis audaklā.
