Rokstu sagataveja: portals lakuga.lv

Daugovpiļs vikingmetala grupa “Varang Nord” 18. septembrī Reigys klubā “Melnā Piektdiena” prezentēs sovu jaunuokū albumu “Pārķiuņa uomurs”. Itys ir jau catūrtais grupys albums.

Grupa “Varang Nord” atpazeistameibu plašuokai sabīdreibai dabuoja piec uzvarys Vuocejis metalfestivala “Wacken Open Air” grupu konkursā 2019. godā. Vikingmetala grupa ir pyrmuo grupa nu Latvejis, kas ir uzvariejuse prestižajā metalmuzykys festivalā.

Grupys sastuovā ir pīci cylvāki – vokalists i gitarists Maksims Popovs, basists Danila Lopuha, buņdzinīks Aigars Zeiza, sytamūs instrumentu meistars Vjačeslavs Janens i akordeoniste Jeļena Kaļniša. “Varang Nord” sovuos dzīsmēs dzīd par varonom kaujom, karuotuojim.

Jaunajā albumā “Pārķiuņa uomurs” ir 11 kompozicejis, tymā skaitā ari dzīsme “Svietņeica”, kas itūgod tyka nomināta latgalīšu kulturys goda bolvai “Boņuks”. Jaunajā albumā, atškireibā nu īprīškejūs, gon nūsaukums, gon ari vysu kompoziceju nūsaukumi ir latgaliski.

Grupa “Varang Nord” ir ari pyrmuo metalmuzykys grupa, kas ir atkluojuse “Latvijas Radio 2” popdzīšmu aptauju “Muzikālā Banka” 2019. godā. Tūšaļt grupa izpiļdeja kompoziceju “Stuojīs” nu albuma “Pārķiuņa uomurs”.

Interveju ar grupu “Varang Nord” par izvēli muzicēt latgaliski, var skaiteit ITE.