Rokstu sagataveja: portals lakuga.lv

26. septembrī Rēzeknis Tehnologeju akademejā (RTA) 10.00 stuņdēs nūtiks seminars “Latgales kultūrtelpas identitātes jautājumi un tās aktuālie izaicinājumi” (par jū vairuok ITE), a piec seminara 16.00 stuņdēs byus ari Nikodema Rancāna bolvys izcyluokajim Latgolys pedagogim padūšonys pasuokums, informej Latgalīšu kulturys bīdreibys vaļdis prīšksādātuojs Jurs Viļums.

Seši školuotuoji sajims eipašu Riharda Cibļa darynuotu saktu, kas jau palykuse par tradicionalu ituo konkursa bolvu. Bolva – sudobra pokovsakta – ir laimis zeime, kam soveiga simboliska i praktiska vierteiba.

Itūgod konkursa reikuotuoji aicynuoja eipašu viereibu pīgrīzt pedagogu spiejom īvīst vysaidus jaunynuojumus sovā dorbā – jaunys pīejis, metodis, strategejis, jū seviški jamut vārā tū, ka īprīškejais vuiceibu gods paguoja organizejūt dorbu golvonom kuortom attuolynuoti. Kai vysod, papyldu punkti viertiešonā tyka tim pedagogim, kas sovā dorbā izmontoj ari latgalīšu volūdu.

Juoatguodynoj, ka izcylais pedagogs i katuoļu goreidznīks Nikodems Rancāns (1870–1933) ir Latgolys pyrmuos atmūdys darbinīks ar īspaideigu davumu Latgolys kulturā i izgleiteibā. Itūgod bolvys padūšonys datums pīskaņuots N. Rancāna dzimšonys dīnai piec jaunuo stila (piec vacuo – jam dzimšonys dīna 13. septembrī).

Rēzeknis Latgalīšu kulturys bīdreiba Nikodema Rancāna bolvu Latgolys izcyluokajim pedagogim īdybynuoja i padeve 2015. godā, iz N. Rancāna 145 godu jubileju. Bolvys mierkis ir na viņ izcyluo latgalīša pīminis saglobuošona, bet ari školuotuoju profesejis populariziešona un juos prestiža paaugstynuošona sabīdreibā, atzeimejūt izcylu un pošaizlīdzeigu pedagogu dorbu.

Kluotīnē pasuokums daīmams viņ personai ar atbylstūšu Covid-19 sertifikatu. Dasasaceišona da 24. septembra, rokstūt iz e-postu: latgalisubidreiba@gmail.com (kluotīnis dalinīku skaits ir īrūbežuots).