Rokstu sagataveja: portals lakuga.lv

Tradicionalūs deju festivalā “Rijas balle” 2. oktobrī 11.00 stuņdēs tīšsaistē byus bubyna aba Latgolys mozūs buņdzeņu meistarklase, kurā bubyna spēlis niansis skaidruos muzykaluos apvīneibys “Dzilna” bubyna spālātuoja Zane Dukaļska.

Zane bubynu spēlej jau vaira nakai 10 godus. “Pyrmū reizi itū instrumentu satyku folklorys ekspedicejā Dagdā, kur jū spēlēja Pīters Verebs. Cīši īsapatyka, kai jis spēlej, i es ari sagribieju tai spēlēt. Piec tam bubyna spēlis pamatus īsavuicieju pi Leitovys etnomuzykologis Rimys Garsonienis. Tod daudz trenejūs sātā,” stuosta Zane.

Bubyns i juo spieliešona ir īkļauta Nacionalajā namaterialuo kulturys montuojuma sarokstā. Zane soka, ka bubynu spēlēt nav gryuši, vys tik vajadzeigs treneņš. “Bubynā maņ pateik tys, ka, jū spielejūt, var izdūmuot jaunys ritma kombinacejis, tys ir interesanti. Instruments kai taids ir ari viereibu pīsaistūšs i niu palics jau visai populars.”

Zane ir spēlējuse gon folklorys kūpā “Vīteri”, gon postfolklorys grupā “Rikši”, tok itūšaļt spēlej muzikalajā apvīneibā “Dzilna”.

“Rijas balle” ir tradicionalūs daņču festivals, kas itūgod izceļ taidu muzykys instrumentu i daņču meistarklasis, kuramuos var pīsadaleit sevkurs, pīmāram, piec bubyna meistarklasis varēs pīsaslēgt mutis ermoniku, karūšu spieliešonys meistarklasei, kai ari īsavuiceit poļku, mazurku i spēlēt stabulis.

Vaira par bubynu i bubyna spēlis tradicejom vari skaiteit ITE.

Verīs “Rijas balli” ITE.