Roksta autors: portals lakuga.lv

5. oktobrī 14.00 stuņdēs Latgolys Kulturviesturis muzejā byus gruomotys “Plōciņu Mase roksta” prezentacejis pasuokums. Plōciņu Masis “kūpuotus rokstus” veidoj humoristiskys viestulis, kurys raksteitys vairuok nakai 25 godus. Kruojuma autore ir bejušuo ilggadejuo laikroksta “Rēzeknes Vēstis” redaktoris vītneica Anita Graudiņa.

Pasuokumā gaida tikšonuos ar autori, viestuļu puorlaseišona i golvonais – izasmīšona i jautreiba. Poša Plōciņu Mase par tū soka: “Es tū pi seve saucu par večerinku, koč nūtiks dīnā. Spēlēs garmanists, “optimistis” nu Gaigalovys kulturys noma senioru amaterteatra “Optimisti” laseis munys viestulis. Aicynoju vysus sovus fanus un fanis (zaļais sertifikats gon vajadzeigs).

Gruomotā apkūpuots muns “myuža dorbs”, nu 1994. goda saguojs ap div symtim viestuļu. Fani jau seņ gaideja itū gruomotu, praseja – kod byus vēļ? kod byus vēļ? Paļdis Dīvam, atsaroda lobvieļs, kas mani kužynuoja,– Raimonds Krasinskis. Jis nadeve mīra, cikom naizguoja gruomota. Pasateicūt jam un atbaļsteituojim Agram Bitānam un Georgam Turlajam, asu tykuse pi gruomotys.

Par moz mes smaidom, reši izasmejam, mieginuošu vysus uzmundrynuot. Kurs čeikst, kurs peikst, bet vys taipat juopagrīž iz gaismys pusi. Nu navarim grimt itamā myglā, kū nazkaids “krūņa vierss” tān aptiņs pasauļam, niu tur vysus bailēs. Juodzeivoj, kai vysūs laikūs asam izdzeivuojuši. Lobuok, ka virusa vītā tys Plōciņu Masis Myužeigs skaistums izaplota pa pasauli un palīk ari cytom paaudzem!”