Rokstu sagataveja: portals lakuga.lv

8. oktobrī 15.00 stuņdēs Latgolys Kulturviesturis muzejā (Atbreivuošonys alejā 102, Rēzeknē) nūtiks gruomotys “Mēs visi esam gūstekņi” attaisiešona, informej Latgolys Kulturviesturis muzeja specialists kulturviesturis vaicuojumūs Kaspars Strods.

Desmitem godu Ūtrais pasauļa kars palics par vīnu nu vysvairuok apsprīstastūs viesturis pūsmu daudzuos pasauļa vaļstīs. Ari Baļtejis vaļstu, tūstorp Latvejis, kontekstā itys militarais konflikts pamatuoti teik pīzeits par ašņainuokū i gryutuokū paguotnis periodu, par kuru vys vēļ ir daudz naatbiļdātu vaicuojumu. Vīna nu vysvaira cītušūs kategoreju beja i nacistiskuos Vuocejis, i Padūmu Savīneibys militarajūs formiejumūs dīnūšī karaveiri, i lela daļa nu jūs guoja būjā na viņ militaruos sadūrsmēs, tok ari teikūt pretinīku giustā.

Ūtruo pasauļa kara laikā ari Latvejis teritorejā tyka tyukstūšom padūmu karagiustekņu, daudzim tei beja pādejuo dzeivis “pīturvīta”. Vīns nu jūs beja Sorkonuos armejis 41. strieļnīku korpusa 177. strieļnīku divizejis 502. strieļnīku pulka karaveirs farmaceits Aleksandrs Orehovs (1917–?), kurs 1941. goda 7. oktobrī palyka par vīnu nu Rēzeknē izveiduotuos karagiustekņu nūmetnis “Stalag 347”īslūdzeitūs. Jau nu pyrmūs nacistiskuos Vuocejis i Padūmu Savīneibys kara dīnu A. Orehovs raksteja dīnysgruomotu, kur atspīgelēja na viņ ceinis frontē, tok ari kasdīnys dzeivi Rēzeknis karagiustekņu nūmetnē.

Pasuokuma laikā Latvejis Zynuotnis padūmis projektā “Pārvērtējot bezvalstiskumu: Pretošanās un kolaborācija Latvijā Otrā pasaules kara laikā” ar publisku lekceju “Kolaborācija un pretošanās Otrajā pasaules karā: sociālā atmiņa un politiskā aizmiršana Latvijā” uzastuos socialuos atminis pietnīks Dr. sc. comm. Mārtiņš Kaprāns. Latgolys Kulturviesturis muzeja viesturnīks Kaspars Strods īpazeistynuos ar karagiustekņu nūmetnis “Stalag 347” viesturi i īsavērs Aleksandra Orehova dīnysgruomotys puslopuos. Apmaklātuoji varēs nūsavērt režisora Askolda Saulīša dokumentalū eisfilmu ““Dievs, Tava zeme deg” Otrais pasaules karš un Latvijas okupācija (1939–1945)” (2018).

Pasuokumā pi izdevnīceibys “Latvijas Mediji” puorstuovim byus vareiba īsaguoduot gruomotu “Mēs visi esam gūstekņi” par izdevieja cenom. Īeja pasuokumā breiva, ar dereigim Covid-19 vakcinacejis i puorslymuošonys sertifikatim i paruodūt personu aplīcynūšu dokumentu.