Intervejis autore: Sintija Augustova, portals lakuga.lv

Latgaliskajā kulturtelpā Upīte pazeistama ar Slišānu saimis aktivū darbeibu, vacuokū latgalīšu muzykys i aiļu festivalu “Upītes uobeļduorzs”, kas itūgod svieteja sovu 20 godu jubileju, niu Upītē ir īspieja īraksteit i apstruoduot muzyku naseņ atkluotajā “Bigmaar’s Records” studejā. Vaira par studeju apsavaicuoju tuos radeituojam i grupys “Unknown Artist” dalinīkam Māram Keišam.

Kai roduos ideja par īrokstu studejis izveiduošonu?

Sapyns par tū maņ ir bejs jau seņ –nu 13 godu vacuma, kod es veiču sovu pyrmū naoficiālū īrokstu sātā ar pošu parostuokū “Skype” mikrofonu. Tai pamozom, aizajiems tehniku nu vysu apleicejūs, atteisteju sovys prasmis, niu asu beidzūt pīpiļdejs sovu vairuok kai 10 godu piļceitū sapynu. Par tū ir juosoka paļdis Latvejai un ES, precizuok, Lauku atbolsta dīnasta LEADER programai, kas dareituojim dūd vareibu dareit, suokt biznesu i izapaust tī, kur gribīs.

Interese par muzykys veiduošonu suokumā tikai digitālā vidē maņ roduos pavysam naapzynuotai. Navaru saprast, nu kurīņs maņ ir tei šausmeigi leluo interese par studejis lītom, bet miglainai atsaceru ainu, kod maņ beja 10 godi, i vīnam pasuokumam Bolvu rajona svātkūs vajadzēja īraksteit, kai dzīd puikys. Un vīns nu tūs puiku beju es. Kai sātā pasaruodeja internets, mudri atkluoju vysaidys programys, ar kuru paleidzeibu taiseju pyrmūs bītus. 16 godu vacumā pat tyku pasaukts iz “Bītmeikeru Battlu” Reigā!

Pyrma treju četru godu es suoču īsaguoduot sovu īrokstu aparaturu, itū pūsmu var skaiteit par suokumu “Bigmaar’s Records” studejai. Īprīšk dzīsmis īrakstejom tyvai na idealūs, na ari lobūs apstuokļūs, ar na puoruok augstys klasis tehniku, tok ar nazkū beja juosuoc. Pamozam sleipejūt prasmis, suocēs dūmys par atseviškys studejis telpys izveiduošonu. Plāns beja tū dareit mīreigai, lānai i nasteidzeigai, tok, kod izzynuojom, ka mums ir pīškierts atbolsts, tempi beja juopauotrynoj.

Vēļ ir seikumi, kas ir juopīloboj, tok mes jau asam paspiejuši īraksteit vairuokys dzīsmis un gaidom sevkuru muokslinīku paraudzeit tū izdareit ar sovu gora dorbu. Dzīsme, proza, audiogruomota – mums vyss ir pa spākam!

Parkū studejai taids nūsaukums?

Tys ir muns “nikneims”, īsauka. Kai ari “Bigmaar’s Records” labi izaklausa i izaver storptautyskajam tiergam.

Kai izalaseji vītu studejai?

Upītē ir dzeive jauka i tī dzeivoj cīši atsauceigs cylvāks – vuordā Andris Slišāns. Pyrma puora godu Andris nūpierka Upītis vacū školu, kur tān klašu telpys teik puorvārstys par vysaidom radūšom ustobom. Lykumsakareigi, ka ar Andri mums ir gondreiž sešus godu ilgys “partnerattīceibys”, maņ kai vīnam nu pyrmūs tyka pīduovuota sova ustoba, kur taiseit ekstremuos puorvierteibys. Tok Andram vēļ ir dažys breivys telpys, kur sevkurs var atrast sovu vītu Upītis Biznesa centrā!

Ar kaidim muokslinīkim “Bigmaar’s Records” studeja jau ir sasadorbuojuse?

Leidz šam pi mane ir gastejuši treis gosti – nasenņ radejuos i straumiešonys vītnēs debitejušuo Amalija, eistajā vuordā Laura Svikša, latgalīšu lobuokuo izklaidis repa apvīneiba “Cegly”, kai ari “Zelta Mikrofons 2021” īgvieja Ūga.

Kas paleidzēja studejis tapšonā?

Vysupyrms, lels paļdis munai saimei, kura ir atbaļstejuse un turpynoj atbaļsteit vysa myuža garumā, lai es leidz itam nūītu, lels paļdis Andram Slišānam par juo nanūviertejamū atbolstu, tikpat lels paļdis juosoka “Unknown Artist” bīdrim, kuri paleidzēja pi vairuok kai pusis vysu dorbu, lai studeja dorbuotūs i izavārtu maksimali estetiski. Eipašs paļdis vītejim uzjāmumim: “Ivano-Wood” par studejis goldu, “FE-DA Cutting” par lāzera grīztū logo iz studejis golda. I paļdis vysim puorejim, kas paleidzēja kai ar dorbim, tai ar vuordim, materialim un finansem, kod tys beja vysvaira vajadzeigs. Vīnu vuordu sokūt – paļdis vysam pasauļam! Turpynuosim dareit lobys lītys, i vyss apleik suoks ruodeitīs tikpat lobs!

Sekoj “Bigmaar’s Records” studejis gaitom ITE, ITE, ar studeju sasazynuot var, rokstūt iz bigmaars.records@gmail.com, kai ari pīrokstūt zinis socialajūs teiklūs.