Rokstu sagataveja: portals lakuga.lv

Grupa “Fak’n’Turīs” sovu debeju muzykā īsuoc ar dzīsmi i liriku video “Izlaidums”. Dzīsme veļteita vysim tim, kas ir pīdzeivuojuši voi vēļ pīdzeivuos vīnu nu skaistuokūs breižu sovā dzeivē – izlaidumu.

Grupys dalinīki dorbojās inkognito, leidz ar tū kotram ir sovs pseidonims – Puika, Nūpītnais, Uztycamais Adjutants, Pavieļneica, Maigais Diktators i LIR. Vīneigais atkluotais grupys dalinīks ir Margarita Kolosova.

“Fak’n’Turīs” sastuovā ir sasapuļcejuši vysaidu paaudžu cylvāki, kurus vīnoj interese par aizguojušuo godsymta 80.–90. godu poproka muzyku. Sovus muzykalūs centīņus grupa niu izpauž na tikai mieginuojumūs, bet ir nūlāmuse atruodeit publikai.

Grupa “Fak’n’Turīs” kaidu šaļti beja pazeistama kai “PusKapļi”, tok grupys dalinīki Nūpītnais i Maigais Diktators skaidroj, ka leidz ar pyrmuo singla izīšonu, “PusKapļi” ir palykuši paguotnē. “Projekts “Kapli” ir nūmirs, pagolam. Beja vārojama nalela kusteiba myrūņu uzškiersšonys šaļtī, kod “Kapļi” puortopa par “PusKaplim”, bet tai gadejuos, ka tī nūmyra da beigu. Kai fenikss nu palnu tyka dzymdynuota grupa “Fak’n’Turīs”,” skaidroj dalinīki.

Grupys dalinīki pībylst, ka klauseituojs pats var saprast, kas sliepās aiz pseidonimu. “Jau var atpazeit, kurs ir maigs, kurs ir pavieļnīcisks i uztycams”.

Dzīsme “Izlaidums” īraksteita ar Saļņevys KN i Eināra Lipska paleidzeibu. 

“Fak’n’Turīs” byus ari eipašī gosti grupys “Dabasu Durovys” koncertā 9. oktobrī Latgolys viestnīceibā “GORS”. Vaira informacejis par koncertu ITE.