Rokstu sagataveja: portals lakuga.lv

“Valodu māja” organizej pyrmūs tīšsaistis latgalīšu volūdys kursus īsuocejim bez latvīšu volūdys zynuošonu. Kursūs izmontuotī materiali piečuok byus kai pamats latgalīšu volūdys vuiceibu gruomotys izdūšonai, kurā latgalīšu volūdu varēs vuiceitīs cylvāki ar prīškzynuošonom latvīšu, krīvu voi angļu volūdā. 

Kursus vadeis latgalīšu volūdys entuziaste i vairuoku latgaliskūs projektu vadeituoja, kai ari īprīškejuo lakuga.lv redaktore Vineta Vilcāne. “Pādejūs godus asu veļtejuse daudz pyuļu latgalīšu volūdys i kulturys populariziešonai na tikai Latvejā, bet ari storptautyskā leiminī. Tys ir ļuovs daudz lobuok apjaust latgalīšu volūdys situacejis plusus i minusus, ari tū, kai volūdys situaceju varātu uzlobuot. Maņ ruodīs svareigi latgalīšu kūpīnai paruodeit, ka par latgaliskū interesejās ari nu uorys, tys ceļ volūdys prestižu pošu acīs, sovutīs puorejai sabīdreibai atguodynoj – latgaliskais ir vierteiba,” stuosta Vineta.

Vineta skaidroj, ka pīkrytuse vadeit kursus, kab varātu popularizēt latgalīšu volūdu. “Vuiceit latgalīšu volūdu uorzemnīkim ir vīns nu veidu, ka latgaliskū nest pasaulī, partū atsasauču “Volūdu sātys” aicynuojumam. Vuiceišona maņ pošai byus lels pīdzeivuojums i ari puorbaudejums. Nūdarbeibu saturs atbiļss volūdu prasmis A1 leimiņam, tī byus poši pamati. Lels uzsvors byus iz runuošonu, tai, lai īvuicātais nūdarātu kasdīnys saziņā.”

Kursu idejis radeituojs Snorre Karkonens-Svensons pībylst: “Kursus reikojam, deļtam ka gribim aprobēt latgalīšu volūdys vuiceibu gruomotu, ari lai popularizātu latgalīšu volūdu uorpus Latvejis rūbežu. Gribim izmontuot sovys zynuošonys i pīredzi volūdu vuiceišonys jūmā, lai izstruoduotu myusdīneigus, interesantus i nūdereigus latgalīšu volūdys viuceibu materialus ari mierkauditorejom, kurom agruok nav bejs nu kuo vuiceitīs. Latgalīšu volūdai vēļ nav tuo statusa, kas tai pīsanuoktu Latvejā. Popularizejūt jū uorzemēs, gribim na viņ sekmēt volūdys storptautyskū atpazeistameibu, bet ari tū, ka cylvāki, kam latgalīšu volūda ir dzymtuo, vaira ar sovu volūdu lapnuotūs i poši plašuok jū lītuotu.”

Dalinīku skaits ir īrūbežuots, grybātuojim juodasasoka leidz 20. oktobram, rokstūt ziņu iz info@valodumaja.lv.

Vaira par kursim var skaiteit ITE.