Rokstu sagataveja: portals lakuga.lv

Latgolys pošvaļdeibu aktivūs jaunuotnis puorstuovus, taipat ari regiona augstuokuos izgleitebys īstuožu studentus i jaunīšus, kas dzeivoj uorpus Latgolys, tok interesejās par regiona ilgtermeņa attieisteibu, leidz 24. novembram aicynoj dasasaceit tīšsaistis/kluotīnis dūmneicai “Es Latgolā 2042”.

Dūmneicys mierkis ir interaktivu aptauju i diskuseju formā nūskaidruot Latgolys regiona atteisteibys vizeju i idejis jaunatnis skatejumā. Dūmneica nūsarysynuos kai latvyski, tai i latgaliski.

“Itei dūmneica teik organizāta kai vīns nu 2022. goda Latgolys Kongresa īskanis pasuokumu. Ideja roduos, plānojūt īskanis aktivitatis, – saprotom, ka da šam tai eisti nav apzynuots godūs jaunuokys sabīdreibys dalis redziejums regiona atteisteibai. Jaunatne ir tei sabīdreibys daļa, kam jau ir i byus ite juodzeivoj, juostyprynoj sovys personeibys, juoveidoj sovys karjerys,” par dūmneicys ideju stuosta vīns nu tuos reikuotuoju Guntis Rasims.

“2042. gods ir izvālāts apzynuoti. Ka videjuo vacuma jaunīts ir aptuveni 21 godu vacs, tod gribim apsavērt, kū jis dūmoj par laiku, kas byus vēļ piec 21 goda. 42 simboliski ir i maratona skaitlis. Tei ir vīna nu gryutuokūs disciplinu sportā, kas prosa lelu motivaceju i pacīteibu. Ituos eipašeibys myusim vysim vajadzeigys, ka kūpā gribim atteisteit regionu,” puorlīcynuots ir Guntis.

Dūmneicai dasasaceit aicynuots sevkurs aktivs jaunīts voi jaunīte vacumā nu 16 leidz 25 godu, kam ir interese i motivaceja kūpā ar cytim jaunīšim apsprīst regiona atteisteibys vizeju i idejis. Dasasaceit dūmneicai var leidz 24. novembram aizpyldūt aptauju ITE.

Dūmneica teik reikuota ar dūmu par 2022. goda aprelī paradzātū Latgolys kongresu i tuo vaicuojumim.