Rokstu sagataveja: portals lakuga.lv

Kab veicynuot literarū procesu Latgolā, dūdūt vareibu latgalīšu rokstu volūdā voi latvīšu literarajā volūdā rokstūšim autorim satikt leluoku auditoreju i skaiteituojim īpazeit jaunus Latgolys kulturtelpā topušus dorbus, bīdreiba “LgSC” jau ūtrū godu izsludynoj konkursu “Latgolys prozys skaitejumi 2021”. Konkursā aicynuoti pīsadaleit vysa vacuma Latgolys kulturtelpai pīdareigi autori, kurī roksta prozu. Konkursa gola pasuokums byus daļa nu storptautyskuo festivala “Prozas lasījumi 2021”.

Literarūs prozys tekstu konkursā “Latgolys prozys skaitejumi 2021”, kura moto ir “Pasaulī vyss ir sasapiņs mozgūs”, autori aicynuoti īsyuteit pošu radeitūs i da tuo napublicātus tekstus latgalīšu rokstu volūdā voi latvīšu literarajā volūdā. Dorbi tiks vārtāti, vysu vaira izceļūt na teksta volūdu, bet literaruo teksta kvalitati i pīdareibu Latgolys kulturtelpai, tai atkluojūt regiona sovpateibu i paruodūt latgaliskumu juo plašuokajuos nūzeimēs. Konkursā īsnāgtūs dorbus vērtēs žureja vysmoz treis Latvejis literaturys procesūs īsaisteitu cylvāku sastuovā. Konkursā ar naudys premejom 200, 150 i 100 eiro apmārā tiks apbolvuoti treis vysuvaira žurejis punktu sajāmušūs dorbu autori.

Pīsadaleit konkursā “Latgolys prozys skaitejumi 2021” var, īsnādzūt dorbus – esejis, stuostus, romanu fragmentus (7000–12 000 zeimu apmārā) – da ituo gods 1. decembra, syutūt tūs bīdreibai “LgSC” iz lgsc@lgsc.lv ar nūruodi “Latgolys prozys skaitejumi 2021″.  Pīsacejumā juobyut teksta elektroniskajai versejai, ziņom par sevi (vuords, pavuorde, dzimšonys gods, nūsadorbuošona, eisa rodūšuo biografeja) i kontaktinformaceja (telepona numers, e-posts). Ar pylnu konkursa nūlykumu var īpasazeit ITE.

“Latgolys prozys skaitejumi 2021” nūslāguma pasuokums byus ituo gods 12. decembrī trejuos stuņdēs piec pušdīņu (plkst. 15.00), ka tūbreid pastuovūšī īrubežuojumi ļaus, iz tū tiks aicynuoti vysi konkursa dalinīki. Lobuokūs tekstu autori pīsadaleis ar sovu dorbu skaitejumim. Pasuokumu varēs vērtīs tīšraidē storptautyskuo literaturys festivala “Prozas lasījumi 2021” sātyslopā i latgalīšu kulturys ziņu portalā lakuga.lv. Vaira informacejis par pasuokumu byus decembra suokumā.

Konkurss “Latgolys prozys skaitejumi” pyrmū reizi tyka reikuots pārn, tymā uzvarēja tekstilmuokslineica i literate Annele Slišāne ar eisstuostu cyklu nu ituo gods suokumā izdūtuo kruojuma “Tuoraga stuosti”. Lobuokūs autoru vydā beja ari Ilze Sperga i Evika Muizniece.  

Bīdreiba “LgSC” (īprīšk “Latgolys Studentu centrs”) ir navaļstiska organizaceja, kas apvīnoj cylvākus, kam ir svareigi saglobuot i atteisteit Latgolys i latgaliskū kulturtelpu, latgalīšu volūdu. Bīdreiba vysod ir raudzejuse vysu pyrma atbaļsteit jaunūs latgalīšu autorus i izdūt kvalitativu literaturu, viereibu vaira dagrīžūt jaunīšu auditorejai.

Festivals “Prozas lasījumi” nūteik nu 1995. goda, tū organizej Latvejis Rakstnīku savīneiba. Laika gaitā “Prozas lasījumi” nu nalela pasuocīņa Andreja Upīša dzimšonys dīnys pīmiņai izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki. Ūtrū reizi sadarbeibā ar festivalu byus ari kaida nūtikšona ar Latgolys autorim.

Konkursa “Latgolys prozys skaitejumi 2021” nūtikšonu atbolsta Vaļsts kulturkapitala fonds.