Rokstu sagataveja: portals lakuga.lv

Pārnejuo goda septembrī Rogovkā nūtyka izcyluo latgalīšu gruomatnīka Andryva Jūrdža atceris pasuokums i koncertuzvadums “Suprātka Kuorklinīkūs jeb Andryvam Jūrdžam 175”. Svātkus atkluoja šyupeļa dzīsme “Leiču, leiču” ar Andryva Jūrdža vuordim, niu plašuokai publikai daīmams atmosferisks šyupļadzīsmis īroksts i video kūpā ar sīvīšu kori “Medicus”.

Ideju radeit dzīsmi ar Andryva Jūrdža vuordim muziķam i grupys “Dabasu Durvoys” dalinīkam, kai ari “Leiču, leiču” muzykys autoram Arņam Slobožaninam pīduovuoja ASV latgalīts i latgalīšu filantrops Pīters Aloizs Ragaušs, kas ir ari Andryva Jūrdža mozmozdāls.

Arņs stuosta, ka nu suokuma dzīsmei roduos melodeja: “Itū dzīsmi es sakomponieju pyrma diveju godu. Interesanti – suokumā maņ atguoja melodeja. Napatyka maņ nivīns Jūrdža dzejūļs, cikom atrodu itū, kas beidzūt patyka. Nazynuoju, ar kaidim akordim apdarynuot. Ir taids pajiemīņs, kur nu suokuma izdūmoj melodeju i piec tam harmonizej. Tai saguoja taida gona jūceiga dzīsme, kas nasasuoc nu tonikys akorda, skaņ sovpateigai.”

Nu suokuma dzīsmi plānuoja kai koncerta “Celīs, bruoļ!” jaundorbu, tok pandemejis deļ tū nasaguoja eistynuot. “Itys formats ir taids, ka tū izpylda vairuoki muokslinīki, sarunuojom, ka tū īdzīduos Ēriks Zeps nu postfolklorys grupys “Rikši”, Juoņs Aišpurs nu grupys “The Sound Poets” i es, Aija Īzaka nu Amerikys īspēlēja vejūli, pats Pīters – kūkli,” skaidroj Arņs. “Publicējom dzīsmi pārnejā godā Latgolys kongresa godadīnā. Tai tei dzīsme ari nūgula. Es jū īkļuovu “Dabasu Durovu” albumā “Perimetrs”, deļtam ka maņ lykuos, ka jai ir potencials.”

Video dzīsmei izveiduot ari aicynuoja Pīters. Dzīsmis kora aranžejis autors ir Mārcis Lipskis. “Es producieju, sarunuoju, kas īraksteis, kur īraksteis, kai tys vyss izavērs, kas fiļmēs. Beja dūma palaist dzīsmi pyrma koncerta (ituo gods 9. oktobrī Latgolys viestnīceibā “Gors” grupai “Dabasu Durovys” beja koncerts “Reits” – aut. pīz.), bet video montiešona aizakavēja. Pyrma koncerta publicējom “Dīna bez gola” (par dzīsmi vaira var skaiteit ITE), tān – itū dzīsmi, kuru izpiļdejom ar kori ari koncertā,” turpynoj Arņs.

Dzīsmis “Leiču, leiču” video ir eipašs. “Vysi nūlyktajā dīnā sabraucem, dzīsmi īrakstējom 11 reizis. Varu pasaceit, ka tys nav studejis īroksts, vyss nūteik dzeivajā, kai niu mūdeigi. Golā ir tei atmosfera i cyta jusšona, dzīsme tyvojās tai formai, kurā jai ir juobyut. Kotrai dzīsmei ir dvēsele i nūlyktais veids, kai tū izpiļdeit. Mums saguoja tikt tyvai taidai formai, kaidā tei skaņ vyslobuok,” pīzeist muzikis. Dzīsmis video tyka filmāts Viļānu bazneicā, video autors – Juoņs Rimicāns, par audio īraksteišonu pasaryupēja Einārs Lipskis.