Rokstu sagataveja: portals lakuga.lv

2.–12. novembrī aizvadeiti virtualī Dīnvydlatgolys nūvoda bārnu i jaunīšu folklorys svātki “Bite pyna zalta krūni”. Itī svātki beja plānuoti jau 2020. gods pavasarī, tok leidza ar strauju kovida izaplateišonu pasuokums tyka vairuokys reizis puorcalts iz cytu datumu, informej Dīnvydlatgolys nūvoda bārnu i jaunīšu folklorys kūpu koordinatore Anna Kārkle.

Kod palyka skaidrs, ka  lelī masu pasuokumi nanūtiks, pasuokuma reikuotuoji apsazynuoja, ka cīš byutiski saglobuot kulturviesturiskū montuojumu i tradicejis, i nūlēme reikuot virtualūs  svātkus. Dorba grupys sastuovā beja projekta vadeituoja, Dīnvydlatgolys nūvoda bārnu i jaunīšu folklorys kūpu koordinatore, folklorys kūpys “Ceiruleits” vadeituoja Anna Kārkle, Vuorkovys vydsškolys folklorys kūpys vadeituoja Helena Ērgle, Rībeņu vydsškolys folklorys kūpys vadeituojis Rita Pudāne i Ārija Bergmane-Sprūdža, Aglyunys vydsškolys folklorys kūpys “Žibacteņa” vadeituoja Lilita Valaine.

Kluotīnē tys byutu vīnys dīnys pasuokums, a virtuali tys nūtyka div nedelis, partū ka tyka pīlāguots školys bārnu i jaunīšu vajadzeibom. Koč ari svātki it kai beja mozuoki, patīseibā – plašuoki. 1.–3. klašu školāni pīsadaleja pagarynuotuos dīnys grupys laikā, a puorejī – attuolynuoti no sovys sātys. Kotru dīnu tyka īplānuota vīna nu meistardarbneicu “Prasmu školā”. Leivuona nūvoda biškūpe Lienīte Neiceniece vadeja radūšū darbneicu “Bišu spiets”, kuramā īpazeistynuoja ar biškūpa profeseju i dravnīceibys nūzari kūpumā. Te beja eistuo vīta “bišu stuostim”, partū ka Lienīte ir ari izcyla stuostneica.

Pasuokuma daleibnīkim beja vareiba pīsadaleit voska sveču līšonys darbneicā, kuru vadeja Leivuona nūvoda biškūpi Olga i Juris Purviņi. Keramikis Līgys Bernānis vadeitajā keramikys darbneicā, tyka gataveiti svečturi. Ar aizrauteibu bārni dorbojās kūkapstruodis darbneicā, kuru vadeja meistars Jānis Ernstsons. Radūšajā darbneicā “Kōdi zīdi pļaveņā?” zuoļu sīva Līvija Paegle īpazeistinuoja ar vysaidim uorstnīceibys augim. Muokslineica Evita Kleina vadeja “Čaklūs rūku” darbneicu, kur nu vysaidim materialim tyka gataveitys biteitis. Ar lelu interesi pasuokuma daleibnīki pīsadaleja nūdarbeibā “Latgolys nūvoda kulinarejis montuojums”, kuru vadeja Vuorkovys vydsškolys folklorys kūpys ”Volyudzeite” vadeituoja Helēna Ērgle. Tim, kurim pateik īt rūtaļuos, beja vareiba īsasaisteit rūtaļu darbneicā “Lielais rotaļnieks”. Rūtaļu darbneicu vadeišona beja uztycāta folklorys kūpys ”Ceiruleits” muzykantim.

Svātki nūsaslēdze ar koncertu “Bite pyna zalta krūni”. Kab sagataveitu koncertu, folklorys kūpys tyka aicynuotys īsnēgt sovys  programys videoformatā, tai demonstrejūt prasmis vīnā voi vairuokūs folklorys žanrūs. Jau div godus folklorys kūpu daleibnīki struoduoja pi tēmys “Rotā saule, rotā bite”, pietejūt folklorys materialus par bitem i dravnīceibu (biškūpeibu). Jau pats fakts, ka sareikuojums nūteik, roda sabīdreibā rezonansi i bārnūs pošapziņu, ka jūs i jūs školuotuoju dorbs ir nūvārtāts.

Virtualūs folklorys svātku reikuotuoji soka paļdis vysim školuotuojim i folklorys kūpu daleibnīkim, kuri īsasaisteja virtualajūs Dīnvydlatgolys nūvoda bārnu i jaunīšu folklorys svātkūs, pībiļstūt, ka svātki ir kotrs pats.