Rokstu sagataveja: portals lakuga.lv

30. novembrī 15.00 stuņdēs “Daugavpils 2027” “Facebook” lopā nūtiks tīšsaistis pasuokums “Daugavpils RADA”, kurymā atbiļdēs iz vaicuojumu – parkū Daugovpilei juobyun par Eiropys kulturys golvyspiļsātu 2027, informej dasacejuma “Daugavpils 2027” komunikacejis specialiste Jeļena Dedele.

Pasuokuma laikā Daugovpiļs 2027 komanda pastuosteis par tū, kai nūteik dorbs pi konkursa ūtruos kuortys dasacejuma izstruodis, kaida teik plānuota Eiropys kulturys golvyspiļsātys 2027 programa, kai jei ītekmēs Daugovpiļs i Latgolys regiona izaugsmi i ar kaidim izaicynuojumim daīs sasaskart.

Taipat pasuokuma daleibnīki varēs izzynuot ari par tyvuokajim kūpradis pasuokumim i vareibu jimūs īsasaisteit. Dasacejuma “Daugavpils 2027” izstruodis koordinatore Diāna Soldāne nūruoda: “Mums ir svareigi na viņ informēt sabīdreibu par dasacejuma izstruodis nūzeimi, gaitu i programā īkļautim pasuokumim, bet ari radeit platformu sarunai ar Daugovpiļs i Latgolys dzeivuotuojim par mums sevkuram aktualim vaicuojumim. Tai kai dasacejums teik izstruoduots, jamūt vārā vysaidus myusu piļsātys i regiona izaicynuojumus i sabīdreibys vajadzeibys, tod dzeivuotuoju vīdūklis i izpratne par procesa gaitu mums ir patīsi byutiska.”

“Daugavpils 2027” komanda aicynoj vysus interesentus pīsadaleit tīšsaistis pasuokumā i jau īprīšk, da 29. novembra, īsyuteit sovus vaicuojumus jūs “Telegram” kanalā, “Facebook” lopā voi “Google” anketā ITE. Iz vysim īsyuteitajim vaicuojumim tiks atbyldāts pasuokuma laikā. Īsapazeit ar Daugovpiļs Eiropys kulturys golvyspiļsātys dasacejumu var ITE.

Lāmumu par leidzdaleibu konkursā “Eiropas Kultūras galvaspilsēta 2027” Daugovpiļs piļsātys dūme pījēme 2020. godā ar mierki vairuot Daugovpiļs storptautyskū atpazeistameibu Eiropā, eistynojūt projektus, kuramūs na viņ īsaisteits plašs storptautyskūs partneru lūks, bet ari kuri veļteiti tēmom, kas ir aktualys vysā Eiropā, eistynojūt drūsmeigys, inovativys idejis kulturys i cytuos jūmuos sadarbeibā ar vysaidu kūpīnu puorstuovim, Daugovpiļs Universitati, uzjiemieju i apleicīnis nūvodu i piļsātu atbolstu, plaši īsaisteit dzeivuotuojus dasacejuma sagataveišonā, atteisteit piļsātvidis lobīkuortuošonu, aktualizēt socialūs i vidis vaicuojumus ar kulturys paleidzeibu. Ituogods julī tyka aizstuovāts konkursa pyrmuos kuortys dasacejums i Daugovpiļs tyka izvierzeita daleibai gola atlasē. Da 2022. gods 4. apreļa Daugovpilei pylnveiduotais dasacejums juopadūd Kulturys ministrejā. 2022. gods majā dasacejums juoprezentej storptautyskai žurejai, kuramā sūpluok 10 uorvaļstu ekspertim leidzdorbojās div Latvejis puorstuovi. Vīnu dīnu pyrma prezentacejis daži žurejis lūcekli pavadeis Daugovpilī, īpazeis jū kluotīnē.