Sagataveja: portals lakuga.lv

Itei ir Laurys Melnis pyrmuo dzejis publikaceja portalā lakuga.lv. Tū jei nūsauce par paraudzeišonu raksteit i publiski pīduovuot ari kū itaidu. Roksta Laura daudzi i vysod ar prīcu juos rokstus publicejam i aicynojam puorskaiteit. Ilzis Spergys sarunu ar Lauru i raksteišonu var puorskaiteit ITE.

***

Itys ir slīku rudiņs.
Vīnys bārni spļaun traukūs,
Ūtruos iz sīnys bīdynoj tykumeigūs vacuokus,
Trešuos pagaisušs nu muna duorza,
Protestejūt pret nabreivpruoteigu tikšonu
Zyvu givieja kopeja buņdžā.

Nikuo naādu i nadzaru,
Kab divdesmit godūs kruotu drūsmi
Saturātu byudūs
I spļautu uorā.

Nuokušai nedelei nadatryuks
Drūsme ir atjaunojams resurss
Aug biologiskajā saimisteibā
Pošpīteikameibys apstuokļūs.

Lai vīni soka,
Ka zyna, kas ir pareizi,
Ūtri – ka latgaliski rokstūšom sīvītem nav vīglai,
Es savalku pīri i atsmeju,
Ka narokstūšai sīvītei byut
Vysgryušuok.

***

Kaitynoj,
Ka latgalīšu volūdu
Sauc par babu volūdu.
Tei vīnaiž babu,
Cik muna.

Tamā dzīžu par Mariju,
Dīva dzemdietuoju,
Majā pi krysta.
Tamā runoju par minoritašu tīseibom
KKC terasē
Pi ols butelis.

Tūlaik beidūs,
Ka kaidu dīnu
Daīšu pi teve i saceišu –
Ka gribi, kab tovi bārni
Runoj latgaliski,
Jem mani.

Niu mes sasateikam reizi godā.
I tys seņ jau ir daudzi par daudzi.

***

Es asu tikai zemnīka bārns
Ar īprīškejūs paaudžu ambicejom genūs
Sovys asu nūsvīduse molā
Kai zečis adeikli nu sastuos klasis.
Labiskī i kreiliskī kaļpeni
Kai žņaugs iz vacūs rānu.
Myusu dīnuos taidus vaira nalīk
(Mani absoluti nainteresej myusu dīnys).

Tu draudzeigi izveļc nu kryuteža kārmana
Malnuo humora plāksteri.
Sylda vaira kai sinepis,
Tok nagrauž kai pypuri.
Es seņ natycu homeopatejai, horoskopim
I vīgli izprūtamim cylvākim.
Tok kotru tovu vuordu vēļ treis dīnys zeišļoju
Kai homeopatiskū zierneiti,
Kūdu kai importa kūšleni,
Līku zam mēlis
Kai validola tableti ar placebo efektu.
Sova klāva lūpu kūpbiļdi
Saucu par astrologiskū karti.
I gūgleju, voi div sarežgeitys personeibys
(Minuss i minuss)
Kūpā veidoj plusu voi tūmār krystu.

Kod gaisā lidoj raketis,
Gribīs saprast,
Voi tys, kas maņ ir dzierksts,
Tev eistyn ir viņ konfeti.

***

Pīraksteju viestuli NEPLP
Kab nūblokej
Nu munu dūmu leinūšū
Mīlys liriku
Kai Krīvejis kanalus.
Tei jau ari viņ dezinformaceja,
Vālamuo uzdūšona par asūšū
Kai glupeibu puorsuotynuota
Torta dekoraceja
Ar eistu zierņa deigstu
Muoksleigūs puču vydā.

Na vysa mastika ir ādama,
Na vysi sapyni stuostomi pusdzeraunei.

***

Reigys myuri nūjauce pyrma 150 godu
Es sovus myurus demonteju pamozom.
Akmiņu vītā tī īmyurātys gruomotys
Pamati ar Breinumzemis puosoku sereju,
Viersā Harija Potera ceglu mugurenis,
Remarka styurs ar nūdzeļtiejušom lopom
Viesturis gruomotys sakrautys škeibā tūrnī,
Viersyunē – dzejūļu kruojumi
Kai Nacionaluos bibliotekys kūre.

Skrundys lokatoru izsprydzynuo’, kod maņ beja napylns gods
Tys asūt saukts par spruodzīni mīram.
Muns mīrs i namīrs ir Siamys dveini
Atškierti puors godu piec pīdzimšonys
Myusu dīnu kirurgeja dora breinumus
Sašyušu jūs otkon kūpā
Iz rānys iztetoviešu lelū ilustrātū enciklopedeju
Ar škierkli par actekim pyrmajā puslopā.

***

Pasaulī pīaug agresejis leimiņs
Manī īaug zīdūšs uobeļneicys zors
Zīdus datynu ar izolentu
Turēsīs godim
Mes tok Latvejā labi dzeivojam bez vātru i cunami.