Rokstu sagataveja: portals lakuga.lv

4. decembrī nūtiks trešais seminars, gatavejūtīs Latgolys kongresam 2022. godds 27.–29. aprelī. Tys byus veļteits Latgolys ekonomiskuos telpys raksturuojumam, kai ari byutiskim izaicynuojumim i jūs rysynuojumim eksporta, uzjiemiejdarbeibys, turisma i augstuokuos izgleiteibys vaicuojumūs. Seminārs tiks translāts tīšsaistē Daugovpiļs Universitatis (DU) sātyslopā, “Facebook” kontā, Latgalīšu kulturys bīdreibys i Latgolys kongresa pasuokumu organizatoru vuordā informej Guntis Rasims.

2022. gods 27.–29. aprelī Rēzeknē nūtiks Latgolys kongress “Latgaliskuma kods Eiropā: nu volūdys da ekonomikai”, kurā tiks izvārtāts padareitais i izvierzeiti jauni aizdavumi viesturiskuo Latgolys kongresa lāmumu īdzeivynuošonai. Itūšaļt teik apkūpuotys idejis i prīšklykumi, kab veiduotu kongresa dīnys kuorteibys i rezolucejis saturu, partū trešais seminars ir veļteits ekonomiskūs vaicuojumu raksturuojumam.

Četruos paneļdiskusejuos “Latgolys ekonomiskuos telpys pīvīnuotuo vierteiba i eksports” (vadeis Dr. Sandra Ežmale), “Uzjiemiejdarbebys (t. sk. jaunuzjāmumu) darbeibys riski i īspiejis Latgolā” (vadeis Ņikita Kazakevičs), “Turisms kai Latgolys ekonomikys augšynejis nūzare” (vadeis Aivars Mackevičs), “Augstuokuos izgleiteibys pīvīnuotuo vierteiba Latgolys regionā ” (vadeis Dr. Artūrs Zeps) kluotīnē i attuolynuoti eksperti diskutēs par kotrai jūmai svareiguokajim izaicynuojumim, pīduovuojūt sovu pasavierīni i rysynuojumu. Sevkurs, kurs dorbojās, dūmoj ci plānoj īsasaisteit ekonomiskūs vaicuojumu rysynuošonā Latgolys regionā, var sekuot diskusejai DU sātyslopā i “Facebook” kontā.

Seminarā apsprīstuos idejis i prīšklykumi tiks apkūpuoti Latgalīšu kulturys bīdreibys sātyslopā. Aicynuoti sovu redziejumu syuteit i tī, kas pīsadola seminarā kai eksperti, i tī, kas grybātu īsasaisteit Latgolys kongresa dorbā. Svareigi atsaguoduot, ka glokalizacejis i digitalizacejis laikmatā ir eipaša vīta i lūma volūdai, tradicejai, kas var palikt par Latgolys izaugsmis veiksmis stuostu, a daudzim uzjiemiejim Latgolā tei jau ir kasdīna. Vuicomēs nu lobuokūs i īsastuojam par jaunom idejom!

Seikuoka informaceja par seminaru i ideju forumu Latgalīšu kulturys bīdreibys sātyslopā ITE, seminara programa ITE.

Seminaru organizej Latgalīšu kulturys bīdreiba sadarbeibā ar Latvejis Nacionalū kulturys centru, tai gatavejūtīs cytugod nūteikūšajam Latgolys kongresam. Seminaru finansiali atbolsta Latvejis Republikys Kulturys ministreja.