Rokstu sagataveja: portals lakuga.lv

4. decembrī 13.00 stuņdēs tiks padūti aplīcynuojumi par namaterialuo kulturys montuojuma (NKM) vierteibys īkļaušonu Latvejis Nacionalajā NKM sarokstā. Svineigā ceremonejā Viļakys kulturys nomā aplīcynuojumus sajims 2020. godā i 2021. godā sarokstā īkļautūs vierteibu dasaceituoji. Pasuokumu vērtīs tīšraidē byus īspiejis Latvejis Nacionaluo kulturys centra sātyslopā, kai ari vītnēs “Facebook”i “Youtube”, informej Latvejis Nacionaluo kulturys centra Sabīdryskūs attīceibu specialiste Linda Ertmane.

Īkļaušonai Nacionalajā NKM sarokstā 2020. gods nūgalē tyka apstyprynuotys pīcys vierteibys, storp jom divejis – nu Latgolys: maja dzīduojumi pi cīmu krystim Zīmeļlatgolā (dasaceituojs Viļakys nūvoda pošvaļdeiba), stykla pyušonys omota prasme Leivuonā (dasaceituojs Leivuona nūvoda dūmis Latgolys muokslys i amatnīceibys centrs).

Īkļaušonai Nacionalajā NKM sarokstā 2021. godā tyka apstyprynuotys sešys vierteibys, storp jom – vīneiguo nu Latgolys: “Saļmes Stērnīnē”, tradicionalī saļmu i bieru dzīduojumi Stiernīnē  (dasaceituojs Stiernīnis draugu bīdreiba). Plašuoku informaceju par vierteibom varams skaiteit ITE, par NKM vierteibom vysaidūs aspektūs daudzreiz rakstejs ari portals lakuga.lv (meklēt car attīceigū atslāga vuordu).

Viļaka par ceremonejis nūtikšonys vītu izalaseita partū, ka nu tūreizejuo Viļakys nūvoda 2017. godā tyka padūts pats pyrmais dasacejums NKM sarokstam, kai ari partū, ka nu saroksta 30 vierteibu četrys dasaceitys taišni nu Viļakys nūvoda.

NKM sarokstu paradz izveiduot 2016. godā pījimtais NKM lykums. Tys ir reguliejums, ar kura paleidzeibu teik veiduota NKM saglobuošonys mierķtīceigam atbolstam vajadzeiguo vide i apstuokli.