Rokstu sagataveja: portals lakuga.lv

Eistynojūt projektu “Metālkalēja Jāņa Ļubkas daiļrades dokumentēšana un popularizēšana”, ir izveiduots video sižets, kurā dokumentāts kaļva dorba process, sovutīs apzynuotī Juoņa Ļybkys dorbi apkūpuoti digitalā fotoalbumā, bīdreibys “Rogovkīši” vuordā, informej projekta vadeituoja Terēze Kūkoja.

Pīredzis boguotuo metalkaļva J. Ļubkys dorba procesu juo darbneicā vairuoku dīnu garumā filmēja Latvejā i uorpus juos rūbežu pazeistamais dokumentalūs filmu režisors Ivars Zviedris. Nu vairuoku stuņžu garuo videomateriala tyka izveiduots kūdūleigs video sižets par J. Ļubkys dorba procesu. Tū verūtīs redzīs, ka metals meistara rūkuos ir paklauseigs i meiksts materials, nu kuruo var veiduot gondreiž vysu. Video sižetā izmontuota ari Vinsenta Kūkoja originalmuzyka.

Kaļva ilgajā dorba myužā veiduotī metalkolumi tyka apzynuoti i fotografāti vysaiduos Latvejis vītuos: Zaļmuižā i juos apleicīnē, Stolerovys pusē, Ludzā i Reigā. Pīredziejušais fotografs Aleksandrs Lebeds meistara metalkolumus īmyužynuojs vairuok kai 300 fotografejuos. Leluokuo daļa fotografeju sakuortuotys metalkaļva J. Ļubkys dorbu digitalajā fotoalbumā. Sevkura albuma lopa pīduovoj  jaunys i naticamys atkluosmis, kas var tapt nu metala: i pučis, i medinīks ar suni, i filigrani kvarbatku ītvori spīgelim i stuņdinīkam.

Tys viņ vēļreiz aplīcynoj, cylvāka fantazejai i īspiejom juos realizēt nav rūbežu, ka viņ dora! Projekta eistynuotuoji vielej ari meistaram vēļ ilgus i ražeigus dorba godus, a skateituojim interesantu i izzynūšu vieršonūs.

Bīdreiba “Rogovkīši” pīsadaleja Vaļsts kulturkapitala fonda mierķprogramys ar vaļsts akceju sabīdreibys “Latvijas valsts meži” finansialu atbolstu projektu konkursā “Latgales kultūras programma 2021”, sajamūt finansialu atbolstu projektam “Metālkalēja Jāņa Ļubkas daiļrades dokumentēšana un popularizēšana”.