Tīšsaistis pasuokums, pīmynūt Audriņu tragedeju pyrma 80 godu
![Tīšsaistis pasuokums, pīmynūt Audriņu tragedeju pyrma 80 godu](https://www.lakuga.lv/wp-content/uploads/2021/12/1000-667-audrini-1000x667-c-default.jpg)
Rokstu sagataveja: portals lakuga.lv
4. janvarī 13.00 stuņdēs Latgolys Kulturviesturis muzejā (LKM) nūtiks tīšsaistis pasuokums “Pagātne un šodiena: Audriņu traģēdijai 80”, informej LKM specialists kulturviesturis vaicuojumūs Kaspars Strods.
Ūtruo pasauļa kara laikā Latvejis teritoreju ītekmēja div totalitarūs režimu – Padūmu Savīneibys i nacistiskuos Vuocejis okupaceja, kurūs eistynuotuos represivuos politikys deļ cīte tyukstūšom cylvāku. Itūgod paīt 80 godi nu tragiskūs nūtikšonu Audriņu cīmā 1942. godā, kas palyka par vīnu nu zynomuokūs nacistu okupacejis laikā Latvejis teritorejā pastruoduotūs nūzīgumu pret civildzeivuotuojim.
Pasuokuma laikā kūpā ar viesturis doktorim Kasparu Zelli i Vladislavu Malahovski, kai ari gidu, sabīdryskū darbinīku Voldemāru Ivdri tiks runuots par nacistiskuos Vuocejis eistynuotū represivū politiku Latvejā (Latgolā), Audriņu tragedejis nūtikšonu, kai ari itūs nūtikšonu atspīgeliejumu padūmu varys godūs i myusdīnuos.
Pasuokums byus vāruojums tīšsaistē LKM socialūs teiklu vītnis “Facebook” kontā.