vuicūs runuot ai kosmosu
Sagataveja: Ilze Sperga i portals lakuga.lv
Mārīte Slišāne par sovim dzejūlim soka: “Tuos vysaiduos dūmys, sajiutys, emocejis manī vysu laiku klejoj, kuortojās, beidej vīna ūtru, stumdej, gryusta… Maņ juos ir juoizlaiž nu seve…” Mārīte, kai i cyti Slišānu saimis puorstuovi, roksta dzymtajā izlūksnē. Kab napagaisynuot Zīmeļlatgolys volūdys kolorita i naapgryutynuot dzejis uztveri, publicejam Mārītis raksteitū izlūksnē i myusdīnu latgalīšu pareizraksteibā. Sarunu ar Mārīti var skaiteit ITE.
| *** īsaguļu lopu pīlītā zuolie viel leist piec solnas nav spāka rānas apaug ar pīpiem i sudobra kierpim tu pylsātas bārns tev kirzaka pretīga naradzi zylzalisudobra dimantus mugurā nasam nūveļc myzu i īpyut stabulie atliduos aizagulejs taurins dasadurs byuda golam tu zīdi kuo vaska puče pa ustobas sīnuom pīrie pīdzymst jauns ryupu zeimūgs biļde iz vakardīnu izaudu deči nu izrautim vuordim lai sasylda saknes zam kuojuom kod treisies i samīļuot sauks… blokus byut *** es tevi viel radzu ai saplaisovušim pierstu golim siermu ocu smaidu nakti atvieri lūgu dzīdovi palāku dzīsmi īnesi kopeja ai pīnu smuordu i tuoraga peiragu ai rozīniem munā kuldā izbalejuse lapiņa saņurcāta i izdyluse pierkums piec breivības navaru atlaist īslaucāts rūku dvīlie i īnosuots ustobas čību šveikuos guļ atvilknie iz vacajuom platiem i cukra traukā ar nūlauztu suonu puosakā pyrms mīga… grybu puorzīmuot tovā kliepie gulēt i murruot naizlaižut nogus… *** nakti pretivejūs viejam staigojūt pa dvora jumtu metu osras preteimā lītam es varu puorlekt tam tymsejam iudiņa caurumam deveņas reizes lomovuos stundinīka mūdynuotojs bārna namīreigūs sapynus sadadzynovu kūpā ai meilys atsazeišonuom guns apād vysu atraugoj viņ piecgaršas smuordu īrokstu dīnrokstā divejus vuordus ES SOLTA… *** pa drupačiņai losu sovu pašapziņu izbyruse iz stygu styguom īmeita dubļūs pi dvora pakša zemes bites oluos kopu kolna viersyunie aizauguse nazuolies dāliju vogā zam zuoleišu sakniem akmiņu storpuos uobeļu zorūs viejojuos ai tuorpainim uobulim mozuo bārna byudu bedrītie i garajuos pinkainajuos bizies školas laika līceibuos i biļžu albumūs… pa drupačiņai salosu līku kārmanā syldu pi kryutiem īcapu torties īsīnu sīra saulie pīrokstu dūmuos dzierdu bārnu smīklūs… dīnrokstā atzeimoju kekseiti – ir! nu reita – mekleju otkol… namuoku nūturiet izsleid caur pierstim Es – muns es… *** vuicūs runuot ai kosmosu pagaidam nasaīt jam napateik munu dūmu smuords gryuzt kryuties napasacātīs auklejums panem pauzi iz muna riekina šūnakt dabasūs kuozas vakardīnai bierst lejā pīdūšonas, lyugšonas i drupeit teiras meilas.. padaudz pa daudz tī daudz? baiss sagiut moš nav man… pošta kastie īlyugums ai šokolada burtim i kruosainuom cukra pierleitiem balle iz plūsta dreskods – sirdsapziņa! *** apaun reitam kuojis bosuos pādas nūsolušas naktie izjaucs putnenim lygzdu zylganas ūlines smiļkties guļ sasīti mozglūs piersti navaru pacelt plaukstuos i daspīst pi kryušu tik daudz acu skatīnu tyuškā pogolmā nu molu moluom zamūškuom ūrbuos manie kuo bārzā… suop dag vacīs uobulu sads ai uobulu sosim reizie sadaga vakardīna i reitdīna palīk palnūs… guns vydā mammas kuozu suknie doncoju līts uzlyudza iz valsi lānū es pasceju – noi!!! Ryugts! *** bierneibas draudzība nūgryma iudins kublā ai kruosainuom led lampiņuom sasavasalova i palyka par musuru plastmasa lelle bez sirds ai izspūrušim motim i bosuom kuojuom auškā lejā lejā auškā plikškinoj malnuos muoksleiguos skrūpstas bez vuordim ceļojums – gola pītura viel nazynamīs – muns laiks nalaiks! iz pudeļu plūsta vīta tikai vīnam tovs gols ir sakrauts ai gruomatu kaudziem viel nalasātuom azara vydā skaiteišu ailis iudins nūreis i pascies paļdīs vakar izoru saulespuču teirumu palyka tymss… otkoln vīna! *** bohēma uobeļu sadā pi akmiņu gunskura elsojūšuos guns cyts skaita zvaigznes i sūla nūnest devenim styurim jai vīnolga kliepie murroj nakts aizvārtuom aciem bučoj pudeļu kakliņus auss lipeņu jei nūtreis uobeļu zori smuordoj pylnbrīda trinkšķ gitaras steigas elpoj melodeju mitrums elsoj bailes … otkoln jei moza meitine kas redzeja treis nuoves… malnas osras kuo sapynā bez kruosu… napīcels nivīns naliks kuldā sateitu babas dečie pučainim īluopim zīd asteres i rudins dzīd saļmas vosorai… *** izspruoga vakardīna es palyku ūtrā pusie ai pierstim taustu zīdu samtu ai mieli giunu līpzīdu mada smuordu klausūs voi mani kuods sauc? te siermums kruosojuos… aprausu osorys izrautejuos nazuoļu bedrīties ceļūs nūkrytuse nakusteigi ļaunu uzamuokt kūdīgīm knišlīm… kūst! tymā pusie aust saule malnraibejai kačenei driebu škapie dzymst bārni jim vīnolga ka tymss… izsliedz guni lai naradzu sovu dūmu! baiss… *** pīdūd, tu eši pavusam mozs breids es nagrybu dūmuot… zīd komulzuole, pļova suleigi palāka apsamuokušs dabasi naleist šokolada putneni diej cukuruotas ūleņas pa tam vydam – pīstuoj pi nasabūjuotuos pļovas īsasakņoj i zīdi! uzsviļpu tyuškumā asiņoj piersti, raveju avīškus atruodiet saulei… brodovu stygu iz bierneibu nasaīt taisna, leikumi, krytumi, mozgli i kanovas… līts izgaisynoj kruosas satak zemes vacuma rānuos… uzspraužu plāksteri nu sapynu skaidrojūšuos gruomatas naktie redzeju līpas zīdam ūzulu zorūs… es žāloju sovas bailes kuo ņaudūšu kačānu …atlaid… *** jai pateik byut vīnai šyupuot bosuos kuojas dīča iudenie giut kurkuļus starp pierstim vāruot dabasus augam i zemi dzīstam elpoj pļova, smylgu zīdi nūbierst samtaini i sudobra pylni.. nūgurumu izpyuš mežs puori mygluotam teirumam… klusums jei zeimoj komiksus putekļūs iz asfalta ai ziernekļa teiklim i myusu sakoltušuom skulpturuom bez dzeivības veistūšus puču vaiņukus ai treispadsmit zīdu kuortuom tyuškas stykla pudeles ai nūzeistuom viersyuniem… telefons saskaita sūļus i vītas kur jei atstuojuse sovu smuordu… i striemeli nu šļapnuo mutesauta jai suloj dviesele… gaiši, gaiši zyla, bluova atsadzert i zīdiet naaizmierstuļu kanovā… *** aizkuoseja popyve, vārdamuos kuo blokus teirumā zemi meili masej traktora rīpas… tu geidi cyta goda! reitdīn, vakardīna byus sveša.. . syt bubynu nūsolušī rūzes zori bārza zorūs lopuom eistin spāka vairs navā līts izmūcejs … saule apsavainovuse, pagrīze muguru majam jai nūputejuse palāka kleita… pīninis aizviera dzaltanuos skrupstas, nagryb slauciet guojeju dubļus sejā pīsytu ai saryusejušu skobu kasdīnas mirkļa biļdi albumā zam kriņča… zynu, byus dīna, kod vyss liksīs svešs… tod tupiešu zam uobeles zorim i apbiršu bolta…bolta bolta… *** pīkusu kustynuot spuornus lidojūt pret vieju… acies smiļkts gryudi putekli i putekšni smogī vuordi… viel drupeit i byus bolti zīdūšīs šlivas kūks apsasiet zorūs, kuo putnu bīdekļam ļaut viejam šyupuot žāluot grybu izlūbiet zīdlapines pa vīnai mozai, trauslai, boltai sasaldiet lada kluceišūs… man vinmār byus pavasars ai boltim zīdim dvorā munam pavasaram pīstāv boltums, naivais boltums ceists i trausls… nūlyku gastinci pi kriņča Boltajam nakuop viersā ar dubļainu zuobaku! *** aizsmoka ceiruls salauztā gaisā cukra pilīnu krusa masej zaļū zuoli paleidz atviert pumpurus, aizdzanūt čāguļus nu zierņu osnu sasola dzīsmes pyrmīs i pādejīs panteņš vyducs – sovaidi svešs… baiss dasadūrt sapleiss kuo gunskurā īmastīs šipers… aizaklīdza pārnuo goda dzymušīs sapyns pīmiersts i aprausts komposta čupā škiergats jādz atrost sauli lai paruodātu kruosainū vādaru… jei toža meklej, lai dasadurtu, lai paruodātu kū pate muok… lai dasadurtu i atkeilynuotu vareibu… lai dasadurtu i dzeivuotu… *** izbyrdynovu mammas kreļļu dzintarus iz stygas iz babas dvoru… lai izdeigst! i izzīd! muna baba ir zuole vusa pļova smuordoj es sajiutu īsaguļūt nadzierdātu šyupļa dzīsmi melodiski auzdama čukst spāka vuordus… muna baba ir zeme… pādas apsačer i nagryb vairs atlaist… rosas piles kitynoj pierstu vydus i īpylynoj sirdspukstus aizmierstajam palākumam vuss zīd vuss smejuos vuss dzīd… man meža zemeņu krelles… ci apiest? ci byrdynuot… *** caur marles filtru pazaveru dabasūs tī ar pierstu īzeimoju smaideni treknu jautojuma zeimi bet nageidu atbiļdes jov sen aizlyuzuši vuordi kuop vīns ūtram puori i viersā a pašā auškā ceļ dvoru aizmierstejim tī smuordoj piec captu buļbu ar seipulim piec izkusuša kriejuma i soltas sirds es namuoku apvelt kiuleni iz prīšku nalyudz īšu ītaguot pavasari pi pyupula atdzymšonas i līta piles bučas dubļūs šudin sasieju zierņus… *** īdūd rūku tam pasauļam zam mans pasastīpt pierstgolūs dasniegt pasauli auškā komulā tynūs saleipūt sazavalūt izuordūt ar itū pasauli stykla odotuom odūt pleivuri smogu cītu syltu zam tuos līpas zīdu smuorda lītā es pacelšu golvu sasabučuošu ar bitiem i sasavilkšu pīcstyura formā kotrā styurie sova sirds… *** atdzysa kopeja kruška aizmyguse dāls pīzaspīds blokus šūreiz nadzierdeju jutu soltuos piedines stundeniks apsastuojs pārnuo goda laikā solts, solds, ryugts juosaceļ, juopīmat molka juoīlaiž suņs guļ otkol pi durovu iz zuobaku kaudzes ledušskapie geida meikla kuortu kuortuom izleist cauri iz viersyunes? atrast celi? *** otkol izbrydu tū stygu sytūs ai vieju izbučovu ladu bet teve nasatyku dabasi kraukškiedami pleisa dziļuos rānuos man suop jiutu sevi aiz muguras snīgs aizber tovus pādus izzīd kaktusi nūbrystūs kirzavnīkūs doncoj viejā plievu karūgi dvors lānuom izlaiž dzeiveibu matuos ceļūs lyugdams piec cylvāka! solst pylni zuobaki tymsuma pylnas kuldas atmiņu pylna sirds pylna es… sagrīzu dīnu rosolā sveču gaismā skrāpeju aizsolušā styklā pīdūšonu grybu lai otkoln stuosti puosoku par pupini, salmini, ūglīti izstuosti vieļreiz viel vinu reizi reizi pareizi … es tovs bārns! | *** īsaguļu lopu pīlītā zuolē vēļ leist piec solnys nav spāka rānys apaug ar pīpem i sudobra kierpim tu piļsātys bārns tev kirzaka preteiga naredzi zylzalisudobra dimantus mugurā nasam nūveļc myzu i īpyut stabulē atliduos aizaguliejs tauryns dasadūrs byuda golam tu zīdi kai voska puče pa ustobys sīnom pīrē pīdzymst jauns ryupu zeimūgs biļde iz vakardīnu izaudu deči nu izrautu vuordu lai sasylda saknis zam kuojom kod treisēs i samīļuot sauks… sūpluok byut *** es tevi vēļ radzu ar saplaisuojušim pierstu golim siermu ocu smaidu nakti atvieri lūgu dzīduoji palāku dzīsmi īnesi kopeja ai pīnu smuordu i tuoraga peirāgu ar rozīnem munā kuldā izbaliejuse lapeņa sataurāta i izdyluse pierkums piec breiveibys navaru atlaist īslaucāts rūku dvīlī i īnosuots ustobas čību šveikuos guļ atviļktnē iz vacajom platem i cukra traukā ar nūlauztu suonu puosokā pyrms mīga… grybu puorzīmuot tovā kliepī gulēt i murruot naizlaižut nogus… *** nakti pretivejūs viejam staigojūt pa dvora jumtu matu os’rys preteimā lītam es varu puorlēkt tam tymsejam iudiņa caurumam devenis reizis lomuojuos stuņdinīka mūdynuotuojs bārna namīreigūs sapynus sadadzynuoju kūpā ar meilys atsazeišonom guņs apād vysu atraugoj viņ piecgaršys smuordu īrokstu dīnrokstā divejus vuordus ES SOLTA… *** pa drupačeņai losu sovu pošapziņu izbyruse iz stygu stygom īmeita dubļūs pi dvora pakša zemis bitis oluos kopu kolna viersyunē aizauguse nazuolēs dāleju vogā zam zuoleišu saknem akmiņu storpuos uobeļu zorūs viejuojuos ar tuorpainim uobulim mozuo bārna byudu dūbeitē i garajuos pynkainajuos bizēs školys laika līceibuos i biļžu albumūs… pa drupačeņai salosu līku kārmanā syldu pi kryutim īcapu tortēs īsīnu sīra saulē pīrokstu dūmuos dzieržu bārnu smīklūs… dīnrokstā atzeimoju kekseiti – ir! nu reita – mekleju otkon… namuoku nūturēt izsleid caur pierstim Es – muns es… *** vuicūs runuot ar kosmosu pagaidom nasaīt jam napateik munu dūmu smuords grust kryutīs napasaceitais aukliejums pajam pauzi iz muna riekina šūnakt dabasūs kuozys vakardīnai bierst lejā pīdūšonys, lyugšonys i drupeit teirys meilys.. padaudz pa daudz tī daudz? baiss sagiut moš nav maņ… posta kastē īlyugums ar šokolada burtim i kruosainom cukra pierleitem balle iz plūsta dreskods – sirdsapziņa! *** apauņ reitam kuojis bosī pādi nūsoluši naktī izjaucs putnenim periekli zylgonys ūlenis smiļktī guļ sasīti mozglūs piersti navaru paceļt plaukstuos i daspīst pi kryušu tik daudz ocu skatīņu tukšā pogolmā nu molu molu zamašku ūrbuos manī kai bārzā… suop dag vacais uobuļu suods ar uobuļu sosim reizē sadaga vakardīna i reitdīna palīk palnūs… guņs vydā mamys kuozu suknē doncoju līts izlyudze iz vaļsi lānū es pas’ceju – nui!!! Ryugts! *** bierneibys draudzeiba nūgryma iudiņa kublā ar kruosainom led lampeņom sasavasaluoja i palyka par musuru plastmasys lele bez sirds ar izspyurušim motim i bosom kuojom auškā lejā lejā auškā plikškinoj malnuos muoksleiguos skrūpstys bez vuordu ceļuojums – gola pītura vēļ nazynomais – muns laiks nalaiks! iz buteļu plūsta vīta tikai vīnam tovs gols ir sakrauts ar gruomotu kaudzem vēļ nalaseitom azara vydā skaiteišu ailis Iiudiņs nūreis i pasaceis paļdis vakar izoru saulispuču teirumu palyka tymss… otkon vīna! *** bohema uobeļu suodā pi akmiņu guņskura elsojūšuos guņs cyts skaita zvaigznis i sūla nūnest devenim styurim jai vīnolga kliepī murroj nakts aizvārtom acim bučoj buteļu kakleņus auss lipeņu jei nūtreis uobeļu zori smuordoj pylnbrīda trinšk gitarys steigys elpoj melodeju mytrums elsoj baile … otkon jei moza meitine kas redzēja treis nuovis… malnys os’rys kuo sapynā bez kruosu… napīceļs nivīns naliks kuldā sateitu babys dečī pučainim īluopim zīd astrys i rudiņs dzīd saļmys vosorai… *** izspruoga vakardīna es palyku ūtrā pusē ar pierstim taustu zīdu samtu ar mēli giunu līpzīdu mada smuordu klausūs voi mani kaids sauc? te siermums kruosuojuos… apraušu osorys izrautajuos nazuoļu dūbeitēs ceļūs nūkrytuse nakusteigi ļaunu uzamuokt kūdeigim knišlim… kūst! tamā pusē aust saule malnraibajai kačīnei driebu skapī dzymst bārni jim vīnolga ka tymss… izsliedz guni lai naradzu sovu dūmu! baiss… *** pīdūd, tu esi pavysam mozs breids es nagrybu dūmuot… zīd komuļzuole, pļova suleigi palāka apsamuokuši dabasi naleist šokolada putneni diej cukuruotys ūlenis pa tam vydam – pīstuoj pi nasamaituotuos pļovys īsasakņoj i zīdi! uzsviļpu tukšumā asiņoj piersti, raveju avīšys atruodeit saulei… broduoju stygu iz bierneibu nasaīt taisna, leikumi, krytumi, mozgli i kanovys… līts izgaisynoj kruosys satak zemis vacuma rānuos… izspraužu plāksteri nu sapynu skaidruojūšuos gruomotys naktī redzieju līpys zīdam ūzulu zorūs… es žāloju sovu baili kuo ņaudūšu kačānu …atlaid… *** jai pateik byut vīnai šyupuot bosuos kuojis prūda iudinī giut kurkuļus storp pierstim vāruot dabasus augam i zemi dzīstam elpoj pļova, smylgu zīdi nūbierst samtaini i sudobra pylni.. nūgurumu izpyuš mežs puori mygluotam teirumam… klusums jei zeimoj komiksus putekļūs iz asfalta ar ziernekļa teiklim i myusu sakoltušajom skulpturom bez dzeiveibys veistūšus puču vaiņukus ar treispadsmit zīdu kuortom tyuškys stykla butelis ar nūzeistom viersyunem… telefons saskaita sūļus i vītys kur jei atstuojuse sovu smuordu… i strēmeli nu sļapnuo mutisauta jai suloj dvēsele… gaiši, gaiši zyla, bluova atsadzert i zīdēt naaizmierstuļu kanovā… *** aizkuoseja popyve, vārdamuos kai sūpluok teirumā zemi meili masej traktora rīpys… tu geidi cyta goda! reitdīn, vakardīna byus sveša.. . syt bubynu nūsolušī rūzis zori bārza zorūs lopom eistyn spāka vaira navā līts izmūcejs … saule apsavainuojuse, pagrīze muguru majam jai nūputejuse palāka kleita… pīninis aizvēre dzaltonuos skrūpstys, nagrib slauceit guojieju dubļus sejā pīsytu ar saryusejušu skobu kasdīnys mirkļa biļdi albumā zam kriņča… zynu, byus dīna, kod vyss liksīs svešs… tod tupiešu zam uobelis zorim i apbieršu bolta…bolta Bolta… *** pīkusu kustynuot spuornus lidojūt pret vieju… acīs smiļkts gryudi putekli i putekšni gryutī vuordi… vēļ drupeit i byus bolti zīdūšais slivys kūks apsasēd zorūs, kai putnu bīdaklam ļaut viejam šyupuot žāluot grybu izgaļdeit zīdlapenis pa vīnai mozai, trauslai, boltai sasaļdeit lada kluceišūs… maņ vysod byus pavasars ar boltim zīdim dvorā munam pavasaram pīstuov boltums, naivais boltums ceists i trausls… nūlyku gastiņci pi kriņča Boltajam nakuop viersā ar dubļainu zuoboku! *** aizsmoka ceiruļs salauztā gaisā cukra pilīņu krusa masej zaļū zuoli paleidz atvērt pumpurus, aizdzanūt čāguļus nu zierņu osnu sasola dzīsmis pyrmais i pādejais paņteņš vyducs – sovaidi svešs… baiss dasadūrt sapleiss kai guņskurā īsvīstais šipers… aizaklīdze pārnuo goda dzymušais sapyns pīmiersts i aprausts komposta čupā škiergats jādz atrast sauli lai paruodeitu kruosainū vādaru… jei ari meklej, lai dasadūrtu, lai paruodātu kū pate muok… lai dasadūrtu i atkeilynuotu vareibu… lai dasadūrtu i dzeivuotu… *** izbyrdynuoju mamys kreļļu dzyntarus iz stygys iz babys dvoru… lai izdeigst! i izzīd! muna baba ir zuole vysa pļova smuordoj es sajiutu īsaguļūt nadzierdātu šyupļa dzīsmi melodiski auzdama čukst spāka vuordus… Muna baba ir zeme… pādi apsačer i nagrib vairs atlaist… rosys pilis kitynoj pierstu vydus i īpylynoj sirdspukstus aizmierstajam palākumam vyss zīd vyss smejās vyss dzīd… maņ meža zemiņu krellis… ci apēst? ci bierdynuot… *** caur marlis filtru pasaveru dabasūs tī ar pierstu īzeimoju smaideni treknu vaicuojuma zeimi bet nagaidu atbiļdis jau seņ aizlyuzuši vuordi kuop vīns ūtram puori i viersā a pošā auškā ceļ dvoru aizmierstajim tī smuordoj piec captu buļbu ar seipulim piec izkusuša kriejuma i soltys sirds es namuoku apveļt kiulini iz prīšku nalyudz īšu ītaguot pavasari pi vierbys atdzymšonys i līta pilis bučys dubļūs šudiņ sasieju zierņus… *** īdūd rūku tam pasauļam zam mane pasastīpt pierstgolūs dasnēgt pasauli auškā komulī tynūs saleipūt sasaveļūt izuordūt ar itū pasauli stykla odotom odūt veļumu gryutu cītu syltu zam tuos līpys zīdu smuorda lītā es paceļšu golvu sasabučuošu ar bitem i sasaviļkšu pīcstyura formā kotrā styurī sova sirds… *** atdzysa kopeja kruška aizmyguse dāls pīsaspīds blokus šūreiz nadzierdieju jutu soltūs piedeņus stuņdinīks apsastuojs pārnuo goda laikā solts, sold’s, ryugts juosaceļ, juopīmat molka juoīlaiž suņs guļ otkon pi durovu iz zuoboku kaudzis ladsskapī gaida meikle kuortu kuortom izleist cauri iz viersyunis? atrast celi? *** otkon izbrydu tū stygu sytūs ar vieju izbučuoju ladu bet teve nasatyku dabasi krauksteidami pleisa dziļuos rānuos maņ suop jiutu sevi aiz mugurys snīgs aizber tovus pādus izzīd kaktusi nūbrystūs kirzaunīkūs doncoj viejā plievu karūgi dvors lānom izlaiž dzeiveibu matās ceļūs lyugdams piec cylvāka! saļ pylni zuoboki tymsuma pylnys kuldys atmiņu pylna sirds pylna es… sagrīžu dīnu rosolā sveču gaismā skrāpeju aizsolušā styklā pīdūšonu grybu lai otkon stuosti puosoku par pupeņu, ciseņu, ūgleiti izstuosti vēļreiz vēļ vīnu reizi reizi pareizi … es tovs bārns! |
