Rokstu sagataveja: portals lakuga.lv

Īsacejumus itai nedeļai sagatavejuse Bolvu Centraluos bibliotekys bibliografe nūvodpietnīceibys skaiteitovā Sarmīte Vorza, sokūt, ka vīnnūzeimeigi juosadūd kulturys i dobys baudejumā iz Bolvu nūvodu, partū ka tī ir kū redzēt, dzierdēt i īpazeit.

Zīmys puosoka i vītejuos legendys Bolvūs

Īsoku izdzeivuot zīmys puosoku Bolvūs, sliepojūt, slidojūt, blitkojūt iz azara voi pasastaigojūt i vārojūt šejīnis skotus. Nūteikti juoaizīt iz Antona Rimoviča skveru, kab puorskaiteitu vīnu nu piļsātvidē radzamuokūs publiskūs uzrokstu latgalīšu volūdā. Kas tī raksteits? Tū redzieset, kod byuset ite. Nūteikti aizejit iz Bolvu parku, pasaklauseit vidis objekta “Gaiss” radeitū vieja muzyku, kai ari var paraudzeit atpazeit Latgolys nūvodu gerbūņus, kas leigojās vieja zvonu melodejā. Vēļ breineiga pastaigu vīta ir Bolvu ‘Stuonheidžu’ aba Luoča duorzs, kas niule ir pīdzeivuojs puorvierteibys. Luoča duorza lapnums ir 23 miļzeigys laukakmiņu kompozicejis nu 49 akmiņu, kas savasti nu Bolvu apleicīnis. Parka vydā ir saleņa ar karalisku akmiņs krāslu, iz kurū vad tylts. Ir taids ticiejums, ka meitai, kurei grib dreižuok izīt pi veira, vajag treis reizis apīt ap saleņu. Izaver, ka tys struodoj, partū ka tylta marguos pasaruoda arviņ vaira sliedzeņu, kū te pamat jaunī puori.

Bolvu nūvoda pieteišona i izzynuošona

Sasasiļdeit piec pastaigys pa Bolvim vari, īīmūt vīnā nu latgalīšu volūdai draudzeigūs vītu – Bolvu Centralajā bibliotekā. Nūvodpietnīceibys skaiteitovā vīnuvīt ir apkūpuota  lela daļa informacejis olūtu par Bolvu nūvoda cylvākim, vītom, nūtykumim, kai ari te vysod vari atrast jaunuokūs nūvodnīku dorbus, tūs vydā ari latgalīšu volūdā.

Taišni itūnedeļ, 26. janvarī, Bolvu Centraluo biblioteka reikoj jau ūtrūs “Pravesta Alberta Budžes pīmiņai veļteitūs nūvodpietnīceibys lasejumus”. Šūreiz tīšsaistē: (meet.jit.si/Novapetniecibaslasijumi). Lasejumu programa ir plaša, i interesenti varēs klauseitīs pravesta Mārtiņa Kluša stuostejumu par latgalīšu volūdu 21. g. s. suokumā Rūmys katuoļu bazneicā Latgolā, profesore Lideja Leikuma i profesors Aleksejs Andronovs viesteis par Mikeļa Bukša dorbu bibliografeju, profesore Skaidreite Kalvāne – par naseņ atrostū Puordaru rūkroksta gruomotu. Bolvu Centraluos bibliotekys vacuokuo bibliotekare Ināra Bobrova īpazeistynuos ar informacejis dabuošonys i datu apstruodis metodem, veidojūt Bolvu regiona kulturviesturis datubazi, Bolvu nūvoda muzeja viesturneica runuos par tielnīku Leo Jāni Briedīti (1922–2007), nūvodpietnīks Ivars Logins stuosteis par Bolvu regiona vītvuordim i ar tim saisteitim artefaktim. Nūvodpietnīks Aldis Pušpurs īpazeistynuos ar zynomim cylvākim nu Susaju pogosta, nūvodpietneica Līga Delvere runuos par Bonifacovys muižys viesturi, bet Škilbānu viesturis pietneica Mārīte Šakina – par Škilbānu muižu. Sovutīs viesturneica Rita Gruševa īpazeistynuos ar naformalū izgleiteibu muzejā kai pietnīceibys sastuovdaļu i tuos rezultatim. Lasejumus nūsliegs Baļtinovys vydsškolys školuotuoja Valentīna Kaša ar stuostejumu par Brīžucīma pogosta školu viesturi.

ITE var īsaviert pyrmajūs lasejumūs izkanejušū ziņojumu prezentacejuos: “Krucifiksi Ziemeļlatgalē. Dinamika 2009/2019” (Ruta Cibule), “Prāvests Alberts Budže” (Aina Rakstiņa), “Bēržu Romas katoļu draudze un Sv. Annas Bēržu Romas katoļu baznīca, Vēstures lappuses” (Anna Griestiņa), “1990. gads Balvos – Balvu Novada muzeja krājuma materiālos” (Ruta Akmentiņa), “Personalizētās tekstilijas Egļavas mežniecības muzeja krājumā” (Aldis Pušpurs), “Ar Pērkonu saistītie vietvārdi un atradumi Latvijā” (Ivars Logins), “Baltinavas vieta administratīvi teritoriālā iedalījuma struktūrās 1920–2020” (Imants Slišāns), Briežuciema pagasta vietvārdi (Valentīna Kaša).

Spēlis i digitali reiki Bolvu nūvoda īpazeišonai

Bolvu nūvodu var īpazeit ari interaktivi sovā datorā voi vīdīreicē, izspielejūt spielis “Cik daudz tu zini par Balvu reģionu?”, “Ziemeļlatgales detektīvi”, nūbraucūt iz izalauzšonys ustobu “Pīci panti” Škilbānu pogosta Upītē voi lītojūt aplikaceju “Baltinova ZOOM”.

• Spēlis “Cik daudz tu zini par Balvu reģionu?” iztruoduotuojs ir Reigys Tehniskuos koledžys absolvents Niklāvs Laicāns (spēli vaicoj te: http://www.balvurcb.lv/cb/). Atbiļdi iz vaicuojumim i kruoj punktus. Ka nazyni pareizū atbildi, ir vareiba pasavērt Bolvu regiona kulturviesturis datubazē (http://www.balvurcb.lv/kb/ ) i nūskaidruot.
• Spēle “Ziemeļlatgales detektīvi” daīmama mobilajā aplikācejā “Actionbound”. Spēlejūt kai kluotīnē, tai digitali vari īsavērt Bolvu nūvoda viesturē, kulturvidē, īpazeit nūvadnīkus, gruomotys i avīžrokstus, digitalūs resursus saisteibā ar nūvodu. 21 nūvoda vītā ir veicami aizdavumi, kas rūsynoj atrast, saskaitiet, pieteit, fotografēt.
• Kab tiktu uorā nu izalauzšonys ustobys “Pīci panti” ir juoizpylda pīci aizdavumi. Kotram aizdavumam atbiļst kaids Ontona Slišāna dzejūls, kas paleidz spieļuotuojim dūmuot pareizajā veirzīnī. Izalauzšanuos ustoba “Pīci panti” ir unikala ar tū, ka tymā vyss ir latgaliski, tī ir bišu strūps i leli aužamī stuovi. Daleibnīki teik īvasti Ontona Slišāna, juo dorbu i aizaraušonu pasaulī.
• Īsoku paraudzeit ari mobilū aplikaceju “Baltinava ZOOM”, ar kurys paleidzeibu ir vareiba īpazeit Baļtinovys viesturiskuos vītys i turisma objektus. Lītuotnis papildu vierteiba – plaši daīmami cylvākstuosti, kas ļaun viesturi i kulturu īpazeit car realim nūtykumim i personažim. Baļtinovys pogosta karte aplikacejā var pītyvynuot leidz atsevišķai ākai voi objektam, nūruodūt tuo nūsaukumu, geografiskū adresi i GPS  koordinatis. Izklikškinūt iz nūsaukuma, atsaver informativais lauks i biļžu galereja ar kūpskotu i detaļom, reizem ari viesturiskim fotoattālim. Lītuotni var izmontuot kai realu ceļa karti.