Rokstu sagataveja: portals lakuga.lv

“Radio SWH” jaunuos muzykys raidejumā “Priekšnams” pasaruodejs i par tikšonu kaidā nu “SWH” grupys radeju staceju rotacejā niu ceinejās debitants ari latgaliskajā hiphopa muzykā Broks, līcynoj “Radio SWH” sātyslopā publicātuo informaceja.

Broks aba eistajā vuordā Raimonds Broks ir jaunais latgalīšu muzykys izpiļdeituojs, muokslinīks, kurs muzykai pīsavērss jau vairuokus godus, nu publiski plotuok atruodeit sovus dorbus sasprīds viņ niu, turūt, ka taišni itei ir eistuo šaļts dūmom i puordūmom par itū realitati i tuos byušonu iz prīšku.

“Radio SWH” jaunuos muzykys raidejumā “Priekšnams” Broks pīsadola ar dzīsmi “Dyumuodami”. Dzīsme topuse itamā vosorā, Brokam struodojūt sovā studejā lauku eipašumā Rēzeknis nūvodā natuoli nu Odumovys azara. Dzīsme asūt kai pošreflekseja, pošanalize, kas savīnuojumā ar pasauļa īspaidim i viertejumu koč kaidā ziņā daīt pi sacynuojuma, ka mes vysi asam vīns vasals, kam ir kūpeiga suokuma byušona. Pi dzīsmis “Dyumuodami” īroksta i apstruodis tolkā guojs latgaliskuo hiphopa laukā jau zynomais producents i bītmeikers Jezups.

Broka dzīsmi “Dyumuodami” “Radio SWH” raidejumā “Priekšnams” var atbaļsteit ar bolsuošonu ITE. Dzīsme par tikšonu kaidā nu “Radio SWH” grupys radeju rotacejā ceinejās vēļ ar cytom 10 dzīsmem i par uzvarātuoju tiks tei dzīsme, kurei dabuos vysvaira bolsu mieneša topā. Raidejums “Priekšnams” skaņ ūtardīnem 19.00, bet nedelis bolsuošona īt nu ūtardīnes 20.00 da cytys pyrmūdīnis 15.00.