Rokstu sagataveja: portals lakuga.lv

Rēzeknis nūvoda Ūzulainis pogosts ar Vaļsts kulturkapitala fonda atbolstu izveiduojs eisfilmu “Paaudzēs saglobuotuos iedīņu receptis Ūzulainī (Senejuos kuknis montuojums)”, informej projekta “Ekspedīcija “Senču ēdienu tradīcijas Ozolainē”” vadeituoja Inga Čekša-Ratniece.

Ekspedicejis laikā tuos dalinīki devēs pi pogosta saimineicu, kuruos ir saglobuojušys sovu seņču iedīņu receptis. Saistūšuokuos receptis i saimineicu stuosti ir atspīgeļuoti eisfilmā.

Kai zynoms, iedīni, ar tim saisteituos tradicejis ir daļa nu namaterialuo kulturys montuojuma, kas, taipat kai tautys mutvuordu daiļrade, atškir vīnys vītys dzeivuotuojus nu cytys. Rēzeknis nūvoda Ūzulainis pogosts ir vīna nu tūs apdzeivuotūs vītu, kur jau seņ sūpluok dzeivoj latvīši, krīvi, pūli, boltkrīvi, ukraini. Tī dorbojās i sūpluok pastuov katuoļu i vacticeibnīku draudzis. Multikulturaluo vide ir ītekmējuse ari kulinaruo montuojuma tradicejis. Vairuokys pogosta saimineicys turpynoj gordai gatavēt, lītā līkūt nu paaudzis paaudzē saglobuotuos receptis.

Eisfilma ir sasatikšona ar kulinaruo montuojuma saglobuotuojom, kuruos vys vēļ cap maizeiti kai jūs babys, taisa breineigus buļbu blīnus ar gali, tūs sutynojūt krīvu ceplī, kai ari ryupejās, kab vys vēļ gūdu goldūs byutu Ūgris galis rulete i taņtis Virginis rauga capumi.

Filmu veiduoja Māris Justs i Ausma Sprukte, tuos idejis autore – Ināra Blinova.