Rokstu sagataveja: portals lakuga.lv

Rēzeknis pošvaļdeiba izsludynuojuse kasgadejū dasasaceišonu Mozūs kulturys i turisma projektu finansiešonys konkursam, kū organizej pošvaļdeibys agentura “Rēzeknes Kultūras un tūrisma centrs” i finansej Rēzeknis dūme, informej Rēzeknis piļsātys dūmis Komunikacejis i Uorejūs sakaru nūdaļu specialiste Marina Sokolova.

Mozū kulturys i turisma projektu finansiešonys konkursam projektus var padūt da 18. februara, jūs realiziešona juoīplānoj laika pūsmā nu ituogods 1. apreļa da 10. decembra.

Projektu konkursa mierkis ir veicynuot kulturys i turisma atteisteibu i jaunradis procesu veiduošonu Rēzeknē, atbolstūt daudzveideigu i kvalitativu pīduovuojumu i veicynojūt sabīdreibys leidzdaleibu piļsātys kulturys i turisma atteisteibā. Projektu konkursā var pīsadaleit i juridiskys personys, i fiziskys personys.

Izviertejūt īsnāgtūs projektus, komiseja pīškiers papyldu punktus tim projektim, kuri atbylst goda prioritatei. 2022. goda mozūs projektu konkursa prioritate – “Inovatīvas idejas, kuras veicina jaunrades procesu veidošanos Rēzeknē”.

Atbylstūši nūlykumam, finansiejums tiks pīškierts da 50% nu īsnāgtuo projekta summys, leidz ar tū pīškiertuo leidzfinansiejuma apjūms nadreikst byut mozuoks par 220 eiro ci nadreikst byut leluoks par 2850 eiro, partū ka kūpejais budžets projektu konkursa atbolstam itūgod ir 10 000 eiro. Ar finansiejuma pīškieršonys kuorteibu, atbolstamajom izmoksom i izviertiešonys kritierejim var īsapazeit nūlykumā. Mozūs kulturys i turisma projektu finansiešonys konkursa nūlykums i dasacejuma veidlopys ITE.

Projektu dasacejumi juoīsnādz pošvaļdeibys agenturā “Rēzeknes Kultūras un tūrisma centrs”, Piļs īlā 4, Rēzeknē (349. kab.) ci elektroniski, parokstūt ar drūsu elektroniskū parokstu, syutūt iz e-postu: kultur@rezekne.lv, t. 26106775.