Roksta autore: Laura Melne, portals lakuga.lv

Pyrma nedelis socialajūs teiklūs pasaruodeja viests, ka tūp pasaulī pyrmais televizejis serials latgaliski “Latgalīšu kaļneni”, kuruo pyrmizruode varātu byut rudinī. Tuo darbeiba rysynuosīs kaidā Dīnvydlatgolys lauku školā i golvonuo sižeta lineja byus saisteita ar cigarešu kontrabandu. Kab izzynuotu vaira par serialu, izvaicuojom tuo idejis autoru Arni Slobožaninu i režisoru Vadimu Bogdanovu.

Muzikis i sabīdryskais aktivists Arnis Slobožanins stuosta, ka ideja par serialu jam rodusēs piec tam, kod izzynuojs par realim nūtykumim sovā dzymtajā Kuorsovys pusē. “Div puiši atvede nu Krīvejis kontrabandys cigarešu kravu, piec tam dūmuoja, kur juos puordūt. Dabuoja kontaktus, tok jūs apmuoneja, cigaretis nūzoga. Tod jī nūlaupeja tū savedieju, kurs beja sarunuojs kontaktus, jū pamūceja, pīdzirdēja i pasyta. Tai jī sarunuoja, ka atdūs naudu par cigaretem, sarunuoja sasatikšonu, bet pa tū laiku jau tys savediejs beja vysu pastuostejs policejai, i puišus arestēja. Piec tam gon tyka nūslāgts mīrizleigums, bet kur palyka cigaretis, nivīns nazyna.”

Arnis, kuram, kai pats soka, “pateik vysaiduokys pyrmuos lītys latgaliski, kab atteisteitu latgaliskū kulturu i padareitu tū modernu”, sovu ideju pastuosteja Daugovpiļs teatra akteram Vadimam Bogdanovam, kurs niu ir tūpūšuo seriala režisors i scenareja autors. Jis sižetu pīlāguojs školys videi. “Lai cik interesants byutu Arņa pastuosteitais nūtykums, kab tū varātu serialā interesanti izstuosteit, tū drupeit vajadzēja izdaiļuot. Ūtrs uzdavums maņ beja dadūt tam koč kaidu “action”, komedeju. Tai ari stuosts suoce maineitīs, i niu jis jau ir dīzgon tuoli nu tuo, kas nūtyka eistineibā,” stuosta Vadims, rezumejūt, ka palics stuosta kūduls, tok cytaiduoki ir personaži i vide. Lai ari baļsteits patīsūs nūtykumūs, tys nūteikti nabyušūt dokumentals serials, tok kai vīnu nu golvonajim uzdavumim obeji seriala autori nūsauc latgaliskys atmosferys radeišonu.

Serials byus par dorbvuiceibys i kimejis školuotuojim, kai ari 12. klasis škoļneicu. Školuotuoju dzeive nav puoruok veiksmeiga – jī sajam minimalū olgu, ir naudys problemys, vīnu komandej sīva, ūtrū otkon sīva ir pamatuse ar naatmoksuotim kreditim, par tū jam draud atjimt dzeivūkli. Jī obeji dūmoj, kur jimt naudu. Tai jī teik pi idejis par cigarešu kontrabandu. Tū izzynoj pīmynātuo meitine, kas nadaudz saisteita ar kriminaluom apryndom i pīduovoj jim sovu paleidzeibu. Serials dūmuots absurda komedejis žanrā. Tuo pagaidu nūsaukums ir “Latgalīšu kaļneni”, kū īsacejs Valentins Lukaševičs, atsasaucūt iz amerikaņu kaļnenim, kod dzeive vysu laiku īt augši i iz zemi. Tok nūsaukums, taipat kai daudzys cytys lītys, par pīmāru, sereju skaits (pagaidom paradzātys četrys) vēļ var maineitīs.   

Cikom uzfilmāta nalela pilotsereja i publiskuots tuos treilers. Niu rodūšajai komandai juosaprūt, kū dareit tuoļuok. Kai soka Vadims i Arnis, variantu asūt cīši daudz. Vyssvareiguokais, saprūtams, ir finansialais vaicuojums. Tok pyrma suokt tū rysynuot, autorim pošim sev juoatbiļd iz vaicuojumu, kū jī grib, tod ari variešūt saprast, cik daudz leidzekļu tam vajadzeigs. Partū ari vēļ nateik publiski izruodāta poša pilotsereja. Jemūt vārā, ka  tei uzfilmāta vīnys dīnys laikā, īspiejams, tū varātu sataiseit lobuoku. Vadims nūruoda, ka serialam, kab jis pīsaisteitu interesi, saprūtams, juobyut profesionalam, eipaši pastreipojūt tehniskū pusi – gaismys, skaņu, kostimus. “Mes, saprūtams, varim serialu nūfiļmēt par 1000 eiro, samoksuot vysim minimalu samoksu, tok bez profesionalys tehniskuos komandys tys nivīnu televizeju nainteresēs. Taidu serialu mes varātu vīneigi īlikt YouTube i kaids tū vys jau nūsavārtu.” Sovpus golvonūs akteru komanda jau asūt veiksmeigi nūkomplektāta. Tī ir Daugovpiļs teatra akteri Ritvars Gailums, Māris Korsiets i Zanda Mankopa. Jūs profesionaliti i pīredzi teatrī i kino Vadims izceļ kai seriala styprū pusi – tei ir komanda, ar kuru var radeit kvalitativu rezultatu. “Ari scenarejs mums ir cīnejams. Asmu tū paruodejs vairuokim cylvākim, kas nūsadorboj ar kino. Jī tū nūviertēja atzineigi, sokūt, ka nu tuo var saīt lobs rezultats,” stuosta režisors i nūruoda, ka jam ruodīs, ka kino vyssvaireiguokais asūt taišni scenarejs. Pilotserejis fiļmiešonai pīsaisteits ari operators Andrejs Kopilovs, ar kuru Vadims sasadorbuojs jau īprškš, tok dialogu autore ir Kristīne Veinšteina, kas ir na tik Daugovpiļs teatra aktrise, bet ari ar lelu pīredzi dorbā ar tekstim.

Arņam jau asūt pīredze ar sovu producātūs i “Latgolys Producentu grupys”, kas īsaisteita ari itymā projektā, veiduotūs dokumentalūs filmu “Latgalīši Sibirī” i “Latgalīši Pīterpilī” puordūšonu straumiešonys platformom, kur interese asūt bejuse taišni nu jūs pusis. Tok asūt gryuši prognozēt, cik varātu byut skateituoju. Jis pīkreit Vadimam, ka serialam juobyut profesionali uzjimtam, eipaši ari deļtuo, ka tys byutu pyrmais serials latgaliski. “Raudzeisim pīsaisteit maksimali daudz leidzekļu skaņai, gaismai, samoksai akterim i tt. Es i Vadimu jau tū dorom. Kur mes meklēsim? Tradicionali raksteisim projektus Vaļsts kulturkapitala fondam, vīns jau ir īsnāgts. Nūteikti snēgsim ari Latgolys kulturys programā. Meklejam pi privatpersonu, daži jau ir atsasaukuši, daži vēļ dūmoj,” uzskaita Arnis.