Rokstu sagataveja: portals lakuga.lv

Igauņu saime nu Gaigalovys pīduovoj nūsavērt jaunu videoklipu i dzīšmu aptaujā “Latvijas Sirdsdziesma” atbaļsteit dzīsmi “Aneitis vaļss”, kas ir vīna nu pārn izdūtuo albuma “Tu munā sirsneņā” jaunūs dzīšmu.

Videoklips dzīsmei “Aneitis vaļss” fiļmāts jau pārnejā rudinī, videoklipā Rasmys i Gunāra Igauņu idejis īmyužynuojs Māris Justs, tok TV pyrmizruode pīdzeivuota viņ itūgod, jo gaideita sova reize pasaruodeišonai LTV raidejumā “Latvijas Sirdsdziesma”. Igauņu saimis puorstuove Rasma Igaune portalam lakuga.lv atzyna, ka videoklipa publiciešona taišni februarī ir i cīši labi, jo dzīsme tai jau i ir par mīlesteibu – pa tekstam i pa vysam labi darūt.

Dzīsmis vuordu i muzykys autors ir Gunārs Igaunis, tei ir par kasdīnu i tyvuokū apleicīni. “Dzīsmi Gunārs eistineibā jau saraksteja pyrma puora godu. Kai i vysod – nu suokuma kautreigi jaunī goboli teik paruodeiti sovejim. Koč i saimē tai par reizi nimoz tik lels atbolsts itai dzīsmei nabeja, bet tod, kod rakstejom jaunū disku, ari itei dzīsme tyka īraksteita,” stuosta Rasma Igaune.  

Atbaļsteit Igauņu saimis dzīsmi “Aneitis vaļss” var da 26. februara, bolsojūt ITE.

Atguodynuosim, ka Igauņu saimis albums “Tu munā sirsneņā” izguoja pārnejuo gods oktobra suokumā. Albumā ir 13 dzīšmu – tuos ir latgalīšu tautysdzīsmis, latvīšu ziņgis i originaldzīsmis, kas kapelys skaniejumā ir energejis pylnys i pamateigys. Albuma izdūšonu Igauņu saime tur par sova montuojuma saglobuošonu i populariziešonu. Vīns nu albuma izdūšonys mierķu bejs ari gribiešona pīduovuot jaunu muzykalū materialu horeografim jaunu deju taiseišonā, vairuokom dzīsmem jau topuse Ilmāra Dreļa horeografeja.