Rokstu sagataveja: portals lakuga.lv

Sastdiņ, 5. martā, Latgolys viestnīceibā GORS Rēzeknē nūtiks Latgalīšu kulturys goda bolvys “Boņuks 2021” padūšonys ceremoneja, kurā tiks nūskaidruoti 10 bolvys sajiemieji par padareitū latgaliskajā kulturā 2021. godā. Nu 15. februara da 1. marta bolvys publikys simpatejis bolsuojumā atbaļsteit sovu favoritu aicynoj ziņu portali lakuga.lv i LSM.lv.

Latgalīšu kulturys goda bolvys “Boņuks” padūšonys ceremonejā catūrtū reizi tiks nūskaidruots ari publikys simpateju bolsuojuma bolvys – Žyka – sajiemiejs. Ūtrū godu bolsuot par sev meiluokū nu vysu 30 “Boņuks 2021” nominantu aicynoj Latgalīšu kulturys ziņu portals lakuga.lv i Latvejis Sabīdryskūs medeju portals LSM.lv. Bolsuojums suocīs 15. februarī portalā LSM.lv i byus da 1. marta pusnakšu, bet bolvys sajiemiejs tiks paziņuots ceremonejā 5. martā. Bolsuot par sovu favoritu par vīnu reizi dīnā, autorizejūtīs ar sovu socialūs medeju profilu voi e-postu.

Bolsuot var ite: https://www.lsm.lv/raksts/kultura/kulturtelpa/noverte-spilgtako-kas-paveikts-latgaliskaja-kultura-sacies-balvas-bonuks-publikas-balsojums.a443117/

Publikys simpatejis bolsuojuma uzvarātuojs ari itūgod sajims keramikis Vēsmys Ušpelis (Malny Wylky) taiseitū muola statueti, kurymā atveiduots Boņuka suņs Žyks, kurs ari tyka īpazeits car režisora Juoņa Streiča kinu “Cilvēka bērns”, kas baļsteita taida poša nūsaukuma rakstnīka Juoņa Klīdzieja romanā i ir bolvys nūsaukuma īdviesmis olūts.

Vysa leluokuo publikys atbolstu i “Žyka” bolvu pyrmajūs divejūs godūs sajēme kulturys viestneica, školuotuoja, rūkdarbneica i tautystārpu darynuotuoja Iveta Seimanova, bet pārn “Žyks” tyka folklorys kūpys “Upīte” rūkuos.

Leidza ar 10 bolvys sajiemiejim i publikys simpateju bolsuojuma uzvarātuoju, Latgalīšu kulturys goda bolvā “Boņuks 2021” itūgod par myuža īguļdejumu latgalīšu kulturys atteisteibā tiks gūdynuots ari kordirigents Juoņs Gruduls

Latgalīšu kulturys goda bolvys “Boņuks 2021” padūšonys ceremoneja 5. martā byus nūsaverama LTV1 eterā, kai ari LSM.lv i REPLAY.lv.

Latgalīšu kulturys goda bolvu “Boņuks” reikoj Latgolys viestnīceibys GORS komanda. Vaira par bolvu: http://bonuks.lv. 

Atguodynojam, ka bolvys “Boņuks 2021” nominanti ir (alfabeta parādā):

1. #100dečiLatvijai digitalā, taktilā, audio-vizualā i zeimu volūdā
2. 20. atkluotuo latgalīšu rokstu volūdys i kulturviesturis olimpiade i 21. skotivis runys konkurss “Vuolyudzāni”
3. Annelis Slišānis stuostu kruojums “Tuoraga stuosti”
4. Bigmaar’s Records īrokstu studeja
5. Bolvu nūvoda zeime latgaliski
6. Folklorys kūpa “Vīteri” i video stuosts “Teika par Rēzeknes Rozi”
7. Gruomota i muzykys albums bārnim “Vuškeņa iz pļovys”
8. Grupa “Bez PVN” ar albumu “Bezgaleibys”
9. Grupa “Latgalīšu Reps” ar albumu “Cyta dzela” i videoklipim
10. Grupa “Varang Nord” ar albumu “Pārķiuņa uomurs”
11. Igora Pliča i Pētera Korsaka izdavums “Latgales fotogrāfi”
12. Ilzis Spergys stuostu kruojuma “Dzeiveiba” radejis lasejumi
13. Jakob Noiman Festival Band ar albumu “Jezups dejo valsi”
14. Latgalīšu meilys aiļu i dzīšmu festivalam “Upītes Uobeļduorzs” 20 godu jubileja
15. Latgolys Planavuošonys regiona pasuokums “Latgales diena 2021”
16. Latgolys regionaluos televizejis saturs latgaliski
17. Latvejis Storptautyskuo keramikys biennale i Martinsona bolva
18. Literate i redaktore Ilze Sperga
19. Marijis Dzeislys dzejūļu kruojums “Vysta smierts”
20. Myusdīnu latgalīšu literaturys raidīroksts “Puslopys”
21. Navigacejis aplikaceja “Waze” latgaliski
22. Oskara Seiksta eistekstu kruojums “Vokora vuordi draugim”
23. Portals lakuga.lv i latgaliskuos kulturys viests video formatā
24. Postfolklorys grupys “Rikši” desmit godu jubilejis koncerts Latgolys viestnīceibā GORS
25. Pyrmuo izalauzšonys ustoba latgaliski “Pīci panti”
26. Raidejums “Cytaidi latviskais”
27. Režisors Mārtiņš Eihe, Rēzeknis teatris “Joriks” i izruode “Mans kaimiņš ebrejs”
28. Tematiskuo izstuode “Politiķei, pedagoģei un sabiedriskajai darbiniecei V. Seilei 130”
29. Tradicionaluos dzīduošonys grupa “Saucējas” ar izdavumu “Dabā”
30. Valentina Lukaševiča dzejūļu kruojums “Pādi navā svāti”