Rokstu sagataveja: portals lakuga.lv

Rēzeknē, Rēzeknis Tehnologeju akademejā (RTA), ituo gods 16. i 17. junī nūtyks storptautyska zynuotniska konference “Regionaluos volūdys izgleiteibā: nu teksta leidz tekstprateiba”, viestej konferencis reikuotuoju atsyuteituo informaceja. Konferencis mierkis ir saleidzynuot pīredzi, pietnīceibys perspektivys i datus nu vysaidu Eiropys i pasaulis regionalūs volūdu kontekstu, i diskutēt par pīejom latgalīšu volūdys vuiceišonā i īsavuiceišonā. Nūtikšona planavuota kluotīnē i pīsasaceišona tai niu pagarynuota da 13. marta.

Konferencē ir planavuots diskutēt par īspiejom, kai regionalū volūdu īsavuiceišonu integrēt majoritatis volūdys (nacionaluos, vaļsts volūdys) zynuošonys, kai iz leksikys ir gramatiskūs strukturu pamata veiduot saprasšonu i par vīnu, i par ūtru volūdu. Fokuss byus iz tom regionalajom volūdom, kas ir ligvistiski i identitatis vaicuojumūs tyvys nacionalajom volūdom i par kurom bīži teik diskutāts statusa sakarā (volūda ci dialekts). Kai par pīmāru, Latvejā taida ir latgalīšu volūda, lejis vuocu volūda Vuocejā, skotu volūda Skotejā, veru volūda Igaunejā ci citys regionaluos volūdys (Fraņcejā, Italejā i c.).

Konferencē “Regionaluos volūdys izgleiteibā: nu teksta leidz tekstprateibai” planavuots saleidzynuot i diskutēt, kai itaida pīeja varātu paleidzēt tim, kuri vuicuos volūdu, īraudzeit kūpeigū i atškireigū, pīškiertu volūdu vuiceišonuos procesam leluoku kognitivū dziļumu i atteisteitu leluoku volūdys izjiutu i saprasšonu. Konferencis reikuotuoji atzeist, ka myusu dīnuos Eiropys regionalūs volūdu īsavuiceišonā teik lītuotys ari cytys pīejis, kas saisteitys ar školānam zynomū ci īsavuicamūs volūdu īkļaušonu vuiceibu procesā. Svareigs faktors itymā koņtekstā asūt ari tys, ka personys, kas vuicuos regionaluos volūdys, nav vīnveideiga cylvāku grupa; atkareibā nu jūs regionaluos volūdys prasmis, var izdaleit mozuokais treis grupys: 1) tī, kuri vuicuos volūdu i zyna nacionalū majoritatis volūdu, bet nazyna ci zyna cīši moz regionalū volūdu; 2) tī, kuri vuicuos volūdu i kasdīnā lītoj kaidu nu regionalajim variantim, a najādz tik labi skaiteit i najādz nimoz raksteit regionalajā vodūdā; 3) tī, kuri vuicuos volūdu i jim ir cīši moz zynuošonu kai par nacionalū, tai i regionalū volūdu (tī, kuri nadzeivoj tik iļgi kaidā vaļstī).

Junī planavuotajā konferencē aicynuoti pīsadaleit regionalūs i mozuok lītuotūs volūdu pietnīki, školuotuoji, školāni, studenti i cyti interesenti, dūmojūt i sprīžūt par volūdys vuicinīku (tūs, kuri vuicuos volūdu) daudzveideigū auditoreju, jūs gribiešonu i motivaceju īsavuiceit regionaluos volūdys. Pīsadaleit konferencē var ar referatu par kaidu nu itūs tematu:

• volūdys vuicinīka perspektiva: gribiešona i īspiejis;
• kai vuiceit regionalū volūdu atkareibā nu potencialuo vuicinīka mierkim;
• ar kaidim pajiemīnim i metodem atteisteit skaiteišonys i raksteišonys prasmi (tekstprateibu);
• kuri digitalī instrumenti i resursi ir nūdareigi tekstprateibys atteisteišonai regionalajuos volūduos;
• kai volūdu īsavuiceišonā likt lītā vysaidus volūdu korpusus;
• kū īkļaut regionalūs volūdu vuiceišonys saturā, ar kaidim tekstim struoduot;
• kai palelynuot motivaceju i iņteresi īsavuiceit regionaluos volūdys;
• kaida nūzeime ir regionalajai volūdai, kas ir tyva nacionalajai volūdai, cytu volūdu īsavuiceišonys i tekstprateibys atteisteišonys procesā.

Aicynuotī konferencis plenarsēdis runuotuoji ir prof. Nikole Naua (Nicole Nau) (A. Mickeviča Universitate Poznaņā, Pūleja), Kadri Koreinik (Tartu Universitate), Birte Ārendta (Birte Arendt) (Greifsvaldes Universitate, Vuoceja). Konferencis dorba volūdys byus latgalīšu, latvīšu i angļu, kotram runuotuojam paradzātais laiks 25 minotys (15 minotys referatam, 10 minotys diskusejai). Pīsadaleišonys moksa ir 80 eiro, studentim 20 eiro, bet školānim bez moksys. Pīsaregistrēt konferencei var ITE, bet vaira informacejis dazynuošonai ITE.