Rokstu sagataveja: portals lakuga.lv

Grupa “Tautumeitas” sadarbeibā ar Renāru Kauperu nu “Prāta Vētra” pīduovoj dzīsmi i video “Muoseņa”, kas ir prīškviestness grupys “Tautumeitas” jaunajam albumam, kurs digitalā versejā izīs jau marta suokumā.

Jaunuos dzīsmis “Muoseņa” videoklips filmāts pārnejuo gods rudinī, nu kai klipa prezentacejā atzyna “Tautumeitas” līdere Asnate Rancāne, tod tam jau ir taida pavasara sajiuta. Klips radeits Vacpībolgys apleicīnē lauku sātā “Vectūļi”, kurai ir vaira nakai 200 godu seneja viesture.  Videoklipa režisors ir Helmuts Bondars, bet operators Gatis Indrēvics.

Dzīsme “Muoseņa”, kurys tekstā sasavej latgalīšu tautysdzīsme i Renāra Kaupera teksts, bet muzyku radejuši Asnate Rancāne, Renārs Kaupers i ari dzīsmis producents Povels Olsens nu Zvīdrejis, ir pyrmais jaunuo grupys “Tautumeitas” albuma “Skrejceļš” prīškviestness. Grupys jaunais albums digitalā formatā izīs 4. martā, bet taustoma albuma verseju pīdzeivuos aprelī. Taipat ituo gods 26. augustā “Tautumeitas” aicynoj iz sovu lelū koncertu ar taidu pošu nūsaukumu “Skrejceļš” Skultis ūstā Saulkrostūs.

Dzīsmē “Muoseņa” grupa “Tautumeitas” pyrmū reizi sasadorboj ar zvīdru producentu Povelu Olsonu (Povel Olsson). Ar jū grupa sasatyka, pasateicūt sadarbeibai ar “Prāta Vētra”, ar kuru Olsons kūpā radejs divejus jaunuokūs grupys albumus. Videoklipa prezentacejā Renārs Kaupers smaidūt nūsaceja, ka jam pīsadaleišana dzīsmē “Muoseņa” ir taids kai atbiļdis guojīņs “Tautumeitom”, kuruos beja “Prāta Vētra” jaunuokuo albuma “Gads bez kalendāra” gaškys.