Rokstu sagataveja: portals lakuga.lv

Ituo gods 1. junī literaturviesturnīks, volūdnīks i publicists Mikeļs Bukšs (1912–1977) tiks atguoduots 110. dzimšonys dīnā. Taišni 110 dīnu pyrma ituos nūtikšonys Bolvu Centraluo biblioteka aizsuokuse stuostu sereju i akceju #SazavasalojarMikeliBukšu, kab pyrma jubilejis izcylū personeibu sabīdreiba īpazeitu vaira.

Akcejis #SazavasalojarMikeliBukšu idejis autore ir Bolvu Centraluos bibliotekys vadeituoja Ruta Cibule. Akcejis dūma ir caur stuostim i atmiņom dažaidūs formatūs izstuosteit vaira par Mikeli Bukšu, juo dorbim i personeibu. Niu gondreiž kotru dīnu Bolvu Centraluos bibliotekys profilā socialajā teiklā Facebook (verīs ITE) teik publicāts kaids jauns stuosts par Bukšu.

“Dūma par Mikeļa Bukša jubilejis gaideišonu jau aiz laika roduos pieški. Deļkuo gon 110. dzimšonys dīnu nasuokt svieteit jau 110 dīnu pyrma Mikeļa dzimšonys dīnys? Tei forma, kaidā mes tū varim dareit šudiņ, ari ir breineiga i ar daudzi īspiejom. 90. godūs mes vyspuor dzeivovom ar Mikeļa Bukša vuordu iz lyupu, jo pasaruodeja juo gruomotys i tys beja koč kas, kū mes pyrma tuo nazynovom voi zynovom cīši moz. I izaruod, ka ir cik daudzi cylvāku, kas ar jū bejuši saisteiti, kam Bukša gruomotys paleidzējušys veiduot dzeivis uzskotu. Caur itim dažaidajim stuostim, atmiņom i atziņom, mes cīši labi varēsim atkluot Mikeli nu dažaidu pušu. Mums piļneigi pītiks, kuo saceit vysu itū laiku da 1. juņa, da dzimšonys dīnys,” stuosta Ruta Cibule. Jei atsazeist, ka aizsuoktais process prosa daudzi energejis i uzjiemeibys, bet cīši daudzi energejis ari īdūd atpakaļ ar vysom atsauksmem, cylvāku atsauceibu, asūt sajiuta, ka ir īsuokts vīns taids cīši dzeivs process. Ruta Cibule atkluoj, ka jau niu asūt daudzi personeigūs stuostu, kurūs izstuosteit, kai ari video īroksti, taipat ar biblioteku ir sasazynuojuse i akcejai sekoj leidza ari poša Bukša saime.

Akcejā planavuots īsaisteit ari cylvākus, kurī ir sasatikuši ar Mikeļa Bukša saimi, cytys Latgolys regiona kulturys īstuodis, kai ari sabīdreibā zynomuokus ļauds. Taipat biblioteka aicynoj akcejā īsasaisteit i pasadaleit ar sovim stuostim, atmiņom kotru interesentu. Sasazynuot ar biblioteku var tīpat socialajā teiklā Facebook voi rokstūt biblioteka@balvurcb.lv.

Bolvu Centraluos bibliotekys vadeituoja Ruta Cibule soka, ka personeigi jai Mikeļa Bukša dorbu studiešona ir pamats mugurkauļam latgaliskajūs vaicuojumūs. “Kūpš es satyku Mikeli Bukšu, munā dzeivē vyss ir kuorteibā,” nūsmej Ruta.

Īcarāts, ka 1. junī, Mikeļa Bukša 110. dzimšanas dīnā, byus ari svātku sasatikšona Bolvu nūvoda Škilbānu pogosta Plešovā, kur ir Bukša dzymtuo sāta. Svātku sasatikšonys eistynuošonu organizēs kai poša Ruta, tai leluokī dorbi byušūt iz Namaterialuos kulturys montuojuma centra “Upīte” direktora Andra Slišāna placu.

Vaira par Mikeli Bukšu, juo dorbim i dzeivi var izzynuot ITE.