Rokstu sagataveja: portals lakuga.lv

Šudiņ, 21. februarī, 35. dzimšonys dīnu svietej muzikis i akters Kristaps Rasims. Sveicam Kristapu svātkūs i pīduovojam juo ituos nedelis kulturys īsacejumu, kas, kai soka pats Kristaps, ir vīns, tok komplicāts. “Maņ kai Latgolys breivdūmeigam patriotam deļ jiusu ir arhaisks i tymā pošā laikā logisks pīduovojums – meklēt prīcu na nazkur pasaulī, bet itepat Latgolā. Kai saimis cylvāks, kam ir sīva i divi bārni, vysod verūs i mekleju – kur aizbraukt , kū pasavērt? I vēļ svareiguok – kai pīpiļdeit dīnu? Ar lepnumu prezenteju breineigu nedeļgolu munā dzymtajā Kuorsovā i tuos apleicīnē!” tai Kristaps.

Kū tī redzēt? Kur aizīt?

Ite Kristaps Rasims pīduovoj daudz dažaiduoku variantu vysom gaumem.

• Dobys parks “Nūmiernis vaļns” – cylvāka mozskorts dobys skaistums.
• Kulturviesturis centrs “Līču mājas” – bez nazkodejūs laiku (paguotnis) nav laiku iz prīšku (nuokūtnis)! I iz tū vysu vēļ var apsavērt i interaktivā veidā!
• “Latgolys šmakovkys” dadzynuotova – myusu kulinarejis montuojuma naatjemama sastuovdaļa. Taipat juoizstaigoj ari Malnovys muižys parks!
• “Ošu mājas” – pastaiga kūpā ar sovvalis zyrgim i vieršim!
• Sportiski izakustēt aktivuos atpyutys parkā “Zīdūņs”!
• Apsavērt Kuorsovys vertikālū aba sakralū pusi – bazneicys.
• Izstaigojit ari Kuorsovu gida pavadeibā – var izzynuot cīši daudz nadzierdātu i interesantu faktu!

Kur paēst?

Kristaps vīnnūzeimeigi īsoka sātys restoranu “Dzīles”, kurā var sajust garšu niansis kai smolkuokajā Parizis restoranā – tik vēļ ar pīvīnuotū vierteibu!

Kur palikt?

Kristaps padūmuojs ari par tuoluokajim gostim, kurim vajadzēs naktssātu. Jis īsoka palikt gostu sātā “Eglaine”, kur var i izapērt, i kuorteigi izagulēt, atpyutys vītā “Pasaka”, kur var padzeivuot rūkeišu sātā, motelī “Aka” voi gostu sātā “Rītupes stārķi”.

“Izaklausa piec baigi lobuo plana! Iz vysom vītom, prūtams, pyrma tuo pīzvonit, lai sarunuotu, kas i kai. A pa ceļam klausitēs grupu “Rupuči”, partū ka myusūs kotrā dzeivoj bārns – vajag atļaut jam izaprīcuot! Lai breineigs laiks munā duorgajā Kuorsovā!” vielej Kristaps Rasims.